ليکنه او اوډنه: محمود محفوظ
هغه انقلاب چې د ۲۳ کلونو په موده کې یې د نړۍ بر او بهر، غرونو، رغونو او ځنګلونو کې انګازې خپرې شوې، نيمه نړۍ یې لاندې کړه، ځمکه يې له عدل او انصاف څخه ډکه کړه، فکر او لارویان یې لا ژوندي او سلسله به يې تر قيامت پورې غځېږي، آيا دغه نظام د زور، جبر او ظلم له لارې منځ ته راغی؟ او که د عدل، انصاف، اخلاقو او پر زړونو د راج کولو له لارې؟
ددې ادعا د ثبوت او سوالونو ته د ځواب موندلو لپاره د محمد صلی الله علیه وسلم د ۸ کلنې جنګي دورې د تلفاتو په اړه يوه نقشه چې تاریخ لیکونکو ثبت کړې ده وړاندې کړو او بيا به يې له نورو نظامونو سره یوه لنډه پرتله هم وکړو، نور قضاوت په لوستونکو.
دا نقشه د ۸۲ جنګونو نقشه داسې ښیي:
هغه نقشه چې تاریخ لیکونکو د رسول اکرم صلی الله عليه وسلم د ملګرو او د هغوی د مخالفینو د افرادي تلفاتو په هکله ويستلې په لاندې ډول ده:
۱- کافران: ۶۵۶۴ بنديان، ۴۵۹ وژل شوي.
۲- مسلمانان: ۱۱بنديان، ۴۵۹ شهيدان.
خو د دې پر خلاف د بې دينه سياست پر بنسټ د ولاړ تهذيب سيکولرېزم او کمونیزم په نتيجه کې نړۍ په لاندې توګه بشري، مادي او روحاني زيان وليد.
په لومړي نړيوال جنګ کې چې په ۱۹۱۴م کال پيل او په۱۹۱۸ م کال پای ته ورسېد افرادي تلفات یې په لاندې ډول دي.
۱- د روسیې ۱۷۰۰۰۰۰ اوولس لکه وژل شوي
۲- د فرانسې ۱۳۷۰۰۰۰ ديارلس لکه او اويا زره وژل شوي.
۳- د ایټالیا ۴۶۰۰۰۰ څلور لکه او شپیته زره وژل شوي.
۴- د اسټراليا ۸۰۰۰۰۰ اته لکه وژل شوي.
۵- د بريتانيې ۷۰۶۰۰۰ اوه لکه او شپږ زره وژل شوي.
۶- د ترکیې ۲۵۰۰۰۰ دوه نيم لکه وژل شوي.
۷- د بلجيم ۱۰۲۰۰۰ يو لک او دوه زره وژل شوي.
۸- د رومانیا ۱۰۰۰۰۰ يو لک وژل شوي.
۹- د امريکا ۵۰۰۰۰ پنځوس زره وژل شوي.
په اجمالي ډول په دې نښته کې د ورټېل وهل شويو خلکو شمېر پنځه شپېته میلیونه، د عامو وګړو شمېر ديارلس ميليونه، ورک شوي عسکر دری ميليونه، ټپيان شل ميليونه، بې کوره شوي خلک لس ميليونه، بنديان شوي درې ميليونه، يتيمان شوي ۹ نهه ميليونه، کونډې شوې پنځه ميليونه، مادي زيان په زرګونو ميليارده ډالره.
دوهم نړيوال جنګ چې په ۱۹۳۹ م کال پيل ۱۹۴۵ م کال پای ته ورسېد چې پکې نظامي افراد د روسیې اووه لکه او پنځوس زره، د امريکا د متحده ايالاتو درې لکه، د انګلستان پنځه نیم لکه، د چين دوه ويشت لکه، د جاپان پنځلس لکه، د عامو وګړو د مړو شمېر اتلس ميليونه.
د ۱۹۴۵ م کال د اګست د مياشتې په شپږمه نېټه، امريکايانو د هيروشيما په ښار اتوم بم استعمال کړ، چې د نفوسو شمېر یې درې ميليونه او پنځه دېرش زره ته رسېده.
په همدې توګه د اګست د مياشتې په اتمه نېټه يې، ناګاساکي بل بم استعمال کړ چې د لکونو خلکو د مړينې لامل وګرځېد.
د اروپا په مذهبي جګړو کې شل لکه خلک ووژل شول، په همدې توګه د اسپانيې دری لکه او څلوېښت زره او دوه دېرش زره وګړي يې نور ژوندي وسوځول شوه، يوازې د کليسا مشرانو دری لکه پنځه دېرش زره ساينس پوهان ووژل او څه يې ژوندي وسوځول.
د امريکا متحده ايالات په کورنيو نښتو کې لس ميليونه خلک ووژل شول، د ويتنام په جګړه کې لس لکه خلک مړه شول چې شپږ پنځوس زره يوازې او يوازې امريکايان وو.
د فرانسې د انقلاب تر بري وروسته د مخالفينو د ټکولو لپاره د ټول وژنې په خاطر د ګوئتين ماشينونه نصب او شل لکه انسانان يې پرې ذبحه کړل.
د روسیې وحشي ځناورو په ۱۹۳۱ م کال کې د کریمیا په جمهوریت کې شل زره خلک ووژل، پنځوس زره يې له هېواده وشړل، د روسیې د احصايې له مخې يوازې ستالين يوولس ميليونه مسلمانان شهيدان کړل، د ختیځ او لودیځ ترکستان يې اتلس ميليونه مسلمانان شهيدان کړل.
په افغانستان کې يې شپاړس لکه مسلمانان شهيدان کړل.
استاد عيسي الپ تګين چې له کمونستي خونړي زندان څخه ژوندی راتښتېدلی خپل د سترګو ليدلی حال داسې بيانوي:
کمونستي وحشي ځناورو به د مسلمانانو بنديانو په سرونو کې ميخونه ټک وهل، ترڅو يې ستوني ته ورسېږي، د زنداني په بدن به يې پطرول شيندل او بیا به یې اور ورته لګاوه، د زنداني اندامونه به يې له سيمونو سره وتړل او بیا به یې د برق جټکه ورکوله، په ټول بدن به يې ورته ستنې او مېخونه ټک وهل، په اوسپنيزو کټونو به يې تر مرګه تړل، په سرو او ګرمو اوسپنو به يې داغل، د سر ویښتان به يې له پوستکي ويستل، په خوله او پزه کې به یې ګرمې اوبه وراچولې، په داسې کوتکونو به يې وهل چې د اوسپنې مېخونه به يې لرل، د ښځينه وو په هکله وحشت او درندګي د اورېده او لوستلو وړ نه ده.
او همدا اوس د فلسطين او اسراييلو تر منځ د نښتې او په هغه کې د مسلمانانو ټول وژنه او د يهودو کړنې له هېچا څخه پټې نه دي.
اوس نو د دې څېړنې او وینې تويولو په مقابل کې هغه انقلاب وګورئ چې د محمد صلی الله علیه وسلم په وسيله د انسان په جسم او روح کې منځ ته راغی، د امن او سولې انقلاب انسان د ځمکې پر سر خليفه وګرځاوه عمل او کړنو کې يې د هغه سيرت او اخلاق يې پريښته وګرځول او دا يوازې په ۲۳ کلونو کې سرته ورسېد، په دې ستر انقلاب کې له دواړو خواوو څخه ۹۱۸ کسان ووژل شول، نو که چېرته موږ د دې ستر انقلاب راوستونکی محمد صلی الله علیه وسلم نړيوالو ته د رحمت، امن سولې، محبت، همدردۍ، خطاب ورنه کړو نور به ورته څه ووايو.
نړۍ د خپلو تبلیغاتو پر مټ کفر سپین او اسلام تور معرفي کړ، خو د دوی کرغېړنه څهره يو ځل بيا د فلسطين په ناورین کې افشا شوه.
يوازې په شلو ورځو کې يې لس زره مسلمانان چې اکثره يې ښځې او ماشومان دي شهیدان کړل.
تاسې د کفر اصلي څهره هلته په غزه کې خورا ښه پېژندلی شئ.
