داعش؛ د کفري نړۍ د پوځونو لپاره د تجربې ډګر!
د داعش منفورې ډلې په ظاهره ځان د لویدیځ دښمن او د اسلامي خلافت د ادعا کوونکي په توګه وړاندې کړ، خو په عمل کې دا د لویدیځو پروژو د خدمت کولو وسیله شوه، یو له هغو مهمو خدمتونو څخه چې داعش د اسلام د دښمنانو لپاره ترسره کړل، یو هم د جګړې ریښتینی ډګر برابرول وو؛ داسې ډګر چې په کې د لویدیځ ځانګړي ځواکونه او شخصي امنیتي شرکتونه وکولای شي زدهکړه وکړي، تجربه ترلاسه کړي او خپلې پوځي وړتیاوې لوړې کړي.
بې له شکه، د پوځونو، په ځانګړې توګه د ځانګړو ځواکونو، یو له اساسي اړتیاوو څخه د جګړې عملي تجربه ده، دا تجربه هغه څه نه دي چې په نقلي روزنیزو برخو کې ترلاسه شي؛ بلکې دا یوازې په ریښتیني او خطرناکو ډګرونو کې ترلاسه کیدی شي، لویدیځ د داسې فرصت لپاره، د ځواکمنو پوځونو پر ځای، له داعشي ډګر څخه ګټه واخیسته.
د امریکا، انګلستان او ځینو اروپایي هېوادونو ځانګړو ځواکونو د داعش ضد عملیاتو په ترڅ کې وکړای شول چې خپله وړتیا په ښاري جګړه، نامنظمو جګړو، د بېپیلوټه الوتکو په کارولو او د عملیاتو مدیریت په پر خطره ځایونو کې پیاوړې کړي.
ډېری هغه عملیات چې په رسنیو کې د “ترهګرۍ سره د مبارزې” په توګه اعلان شوي وو په اصل کې د لویدیځو د تازه تکتیکونو آزموينې ډګر و، په بل عبارت، داعش د روزنیز دښمن رول لوبولی؛ یو دښمن چې لګښت یې د عراق، سوریې او نورو مظلومو هېوادونو لخوا ورکړل شو، مګر پایله یې د لویدیځ د ځواکونو رزمي وړتیاو پیاوړتیا وه.
خصوصي امنیتي شرکتونه چې د مزدورانو د روزنې کار یې کاوه، هم د داعش له شتون څخه تر ټولو ډېر ګټه پورته کړه، دغو شرکتونو ته اړتیا وه چې د خپلو خدمتونو د پلور لپاره حکومتونو او نړیوالو بنسټونو ته وښيي چې د دوی ځواکونه په واقعي جګړو کې ازمویل شوي دي؛ او داعش ورته تر ټولو ښه ډګر برابر کړی و.
دوی وکولای شول چې خپل ځواکونه په واقعي شرایطو کې وروزي او ترې کار واخلي. د تیلو د تأسیساتو، ډیپلوماټیکو کاروانونو، تهاجمي عملیاتو او د کوچنیو پوځي ټیمونو اداره کول ټول د داعش په ډګر کې وازمویل شول، دا تجربې وروسته د دغو شرکتونو د «رزومې» او کاري سابقې په توګه وکارول شوې او د همدې له امله یې د نړۍ په کچه د لویو امنیتي قراردادونو په لاس راوړلو کې سترې ګټې ترلاسه کړې.
په دې ډول، داعش د دغو شرکتونو لپاره د یوې میداني پوهنتون بڼه خپله کړه؛ داسې ځای چې د داعش ړوند تاوتریخوالی یې استاد او د لویدیځ مزدوران یې زدهکوونکي، هغه څه چې د سیمې د خلکو لپاره د مرګ او ورانۍ معنا درلوده، د دغو شرکتونو لپاره د تجربې او اقتصادي ګټې لویه سرچینه شوه.
د دې تجربې یوه بله برخه په راتلونکي د مسلکي اجیرانو روزنې پورې اړه لري. هغه کسان چې د داعش سره یوځای یا د دې شرکتونو تر اغیز لاندې جنګیدلي وو وروسته د همدې امنیتي شرکتونو لخوا جذب شول، زرګونه پخواني جنګیالي، که پخپله د داعش څخه وي یا د نورو تړلو ملیشو څخه، وروسته په افریقا، لاتین امریکا یا منځني ختیځ کې د اجیرانو په توګه وکارول شول.
دا اجیران، چې د داعش په ډګر کې یې جنګي مهارتونه، پرمختللې وسلې او کلیدي تاکتیکونه زده کړي وو، وروسته په نورو لویدیځو پروژو کې وکارول شول. په پایله کې، داعش یوازې یو لنډمهاله ګواښ نه و، بلکې د اجیرانو فابریکه وه چې خدمات یې مستقیم ډول لویدیځ ته کېدل.
دا باید په پام کې ونیول شي چې لویدیځ د خپلو جنګي وړتیاوو په پیاوړتیا بسنه ونکړه. د داعش شتون په سیمه کې د اوږدمهاله پوځي شتون لپاره یوه بهانه شوه، هرکله چې خلکو د اشغالګرو ځواکونو د وتلو غوښتنه وکړه، لویدیځ د داعش ګواښ ته په اشارې سره خپل شتون “اړین” معرفي کاوه، سربیره پردې، سیمهييزو حکومتونو ته د وسلو پلور هم وده وکړه؛ په داسې ډول چې لویدیځو هیوادونو، د داعش ګواښ مبالغه کولو سره، د ملیاردونو ډالرو وسلو قراردادونه لاسلیک کړل.
له بلې زاویې څخه، لویدیځو رسنیو هم له داعش څخه ګټه پورته کړه، د داعش تاوتریخوالي صحنې او زړه راښکونکي تبلیغات د لویدیځو رسنیو لپاره چمتو خواړه وو ترڅو ویره او وحشت رامنځته کړي او د دوی د حکومتونو د جګړې هڅوونکو پالیسۍ توجیه کړي، له همدې امله، داعش نه یوازې د نظامي تجربې لپاره ډګر و، بلکې تبلیغاتي او اقتصادي وسیله هم وه.
په پای کې، که موږ په سیمه کې د داعش رول په دقت سره وڅیړو، وینو چې دا منفوره ډله په عملي توګه د لویدیځ په خدمت کې یوه وسله ګرځیدلې، تر ټولو مهم خدمت چې دوی ترسره کاوه د ځانګړو ځواکونو او خصوصي امنیتي شرکتونو لپاره د روزنې او تجربې ترلاسه کولو یو ریښتینی ډګر رامنځته کول وو؛ هغه شرکتونه چې وروسته په نورو هېوادونو کې د مسلمانانو د ژوند لپاره یو آفت شو.
هغه څه چې د مسلمان ملتونو لپاره مرګ، کډوالي او وراني وه، د لویدیځ لپاره د جنګي وړتیا لوړونه، د اجیرانو روزنه او د راتلونکو ځواکونو چمتو کول و، په پایله کې، داعش، د لویدیځ دښمن کیدو پرځای، په حقیقت کې د هغې د پیاوړتیا لپاره یوه وسیله شوه؛ یوه وسیله چې د مظلومو ملتونو د وینې او کړاو څخه جوړه شوې وه، مګر ثمر یې د اسلام د دښمنانو په لاسونو کې راټوله شوه.
