د اسلامي دولت د څېرې بدنامول
له هغه وخته را په دې خوا چې د عثماني خلافت بنسټ ونړېد، د اسلام دښمنانو خپل ټول وس، مکر او هڅې په کار واچولې، تر څو د داسې دولت د بیا راټوکېدو مخه ونیسي؛ چې په رښتینې مانا د اسلام ژغورونکی او استازی وي.
کفري هېوادونو د اسلامي دولت د مخنیوي لپاره، پر اسلامي هېوادونو څو څو ځله نظامي یرغلونه کړي او کله ناکله یې فرهنګي یرغل ته مخه کړې، څو خپلې ناوړه موخې د اسلامي هېوادونو په خاورو پلي کړي.
بېشکه، د اسلامي حکومت د مخنیوي لپاره د لویدیځې نړۍ له وسایلو څخه یوه مهمه وسیله، په ټولنیزو رسنیو او مجازي فضا، پراخ دروغجن تبلیغات دي چې د اسلامي حکومت د بدنامولو او د هغه پر خلاف حکومتونو لکه سیکولریزم او دموکراسۍ د ښې ښودلو لپاره ډېر مهم رول لوبولی دی.
خو په تېرو څو کلونو کې، داعشي خوارجو د خپل سر جوړ شوي دولت په اعلان او هغه د اسلامي حاکمیت د معرفي کولو په توګه، کفري نړۍ ته تر ټولو ستر او اغېزناک خدمت وکړ، څو رښتینی اسلامي دولت بدنام کړي.
په دې موده کې نه یوازې غیرمسلمانان، بلکې ګڼ شمېر مسلمانان هم د خوارجو دا منحوس حاکمیت، یو اسلامي دولت او د اسلام استازی وباله او همدا لامل شو، چې د اسلامي نړۍ عام ولس هم د اسلامي دولت په نوم یو ویرونکی تصویر په خپلو ذهنونو کې رسم کړي.
هغه دولت چې بنسټ یې رسول صلیاللهعلیهوسلم په مدینه منوره کې کېښود، چې عدالت، ورورولۍ، رحمت، الهي شریعت او د امت پر خیر ولاړېدل یې اصول او اساس و؛ نه تاوتریخوالی، بېسوچه تکفیر او پر مسلمان او غیرمسلمان ظلم او جبر.
خو داعشي خوارجو د اسلامي دولت له نوم نه په ناوړه ګټه اخیستو سره، د داسې کړنو لکه غیراسلامي وژنې، غیرانساني شکنجې، د کورونو، بازارونو او جوماتونو ویجاړولو له لارې، د اسلامي واکمنۍ یو ډارونکی او منفور تصویر د نړۍ په ذهنونو کې انځور کړ؛ داسې یو تصویر چې له نبوي سنت او د خلفای راشدینو له سیرت سره هېڅ تړاو نه لري.
هغه څه چې دوی د اسلامي دولت په نوم معرفي کړل، په حقیقت کې بل څه نه وو، بلکې یو له مخکې پلان شوې پروژه وه، چې د اسلام د دښمنانو له خوا د دې لپاره جوړه شوې وه، څو د مسلمانانو له ذهنونو څخه د اسلامي دولت مفکوره له منځه یوسي.
د داعشي خوارجو د پروژې اصلي موخه دا وه، چې مسلمانان، په ځانګړي توګه ځوان نسل، د اسلامي دولت د جوړېدو له مینې او هيلې لرې وساتي او داسې فکر وکړي چې د اسلام د حاکمیت هره هڅه به ضرور د داعشي خوارجو په شان وحشتونو ته لار پرانېزي.
په همدې ډول، د اسلام دښمنانو هڅه کوله چې د امت له زړونو څخه د اسلامي دولت د رامنځته کېدو هیله ووژني او هغوی دې ته اړ کړي چې تلپاتې د سیکولر، ملتپالو او لویدیځ پورې تړلو نظامونو منونکي پاتې شي.
