خوارج یوه داسې ډله ده، چې د اسلام په لومړۍ پېړۍ کې را څرګنده شوه او د وخت په تېرېدلو سره هر ځای کې را ښکاره شوه، دا ډله د اسلام له اصلي مسیر څخه منحرفه او د مسلمانانو په تفکیر او وژلو بوخته شوه، د خوارجو په اړه ډېر نبوي احادیث شته او دوی ته پکې نه یوازې د “دوزخ سپیان” خطاب شوی؛ بلکې تر حیواناتو هم بدترین
یاد شوي دي.
که څه هم دا مهال د خوارجو هغه تاریخي ډلي نسته؛ خو موږ د نبی کریم صلی الله علیه وسلم په احادیثو څرګند دلایل لرو، چې دغه ډله به د اسلام په هر پیر او عصر کې راڅرګندېږي، د داعش د جنایتونو او وحشتونو او د خوارجو په اړه په نبوي حدیثونو کې د ذکر شوي تشریح په نسبت موږ دې نتیجې ته رسېدلي یو، چې داعش د دې عصر خوارج دي، داسې ښکاري چې د داعش پیروان منحرف شوي او د دوی پر وړاندي جګړه واجب ده.
دلته د يوې خبري یادول اړین دي، چې البغدادي سره بیعت کول یو باطل او ناروا کار دی او موږ باید دا څرګنده کړو، که څه هم دغې ډلې ته یو دولت ویل کېږي؛ خو د شریعت له نظره دا یو دولت نه دی، او دا خبره چې دوی ځان اسلام ته منسوبوي بلکل ناسمه ده، بلکې دوی د اسلام سره هیڅ اړیکه نه لري.
داعش اسلام او د جهاد خیالي تصور د ځوانانو د استخدام او په ګرده نړۍ کې د هغو مسلمانانو د خطایستلو لپاره کاروي، چې د چین څخه تر اتلانتا پورې د یوه داسې دولت د تأسیس خوبونه ویني، چې د دوی ګټي به په کې خوندي وي؛ نو ایا د داعش پیروان په دې نه پوهېږي، چې د دوی دا ماموریت سرته رسېدل به هيڅکله امکان و نه لري؟
نه، هيڅکله نه، ځکه چې دوی د یوې ناسمي وړاندوینې او وهم په نړۍ کې اوسي، فکر کوي چې د دوی دغه ناوړه اعمال به دوی په دې قابل کړي، چې د فاتحانو په توګه راڅرګند شي، له همدې امله دوی دغه جنایتونو ته خوشحال دي، چې په هره مذهبي سیمه کې بې ثباتي راولي.
د نړۍ پر وړاندي د جګړې څخه دوی یوه داسې اساسي موخه لري، چې موږ باید هیڅکله د پلې کېدو اجازه ور نه کړو او هغه دا، چې دوی غواړي لوېدیځ د اسلامي نړۍ پر واړندي را وپاروي او له دې لارې خپلي جګړې ته مشروعیت ورکړي او له بلي خوا هغه ناخبره مسلمانانو ته دا انګېزه ورکړي، چې د دوی د مفسدي نظریې او دا عیې ملاتړ وکړي.
