داعش د یوې منحرفې ډلې په توګه د خپل تاسیس له ورځې د خپلو بادارانو د هغه پروژې د پیاوړتیا لپاره کار کړی دی، چې په غرب کې د اسلام د سپکاوي او ماتې لپاره طرحه شوې ده او کوښښ یې دا دی چې اسلام خپلو خلکو ته د یوه ډاروونکي او د سولې مخالفت دین په توګه معرفي کړي او وکولی شي چې په دې ډول د اسلام د چټک خپراوي مخنیوی وکړي، ځکه خو ددې نوم لپاره په غیر مستقیم ډول داعش او ورسره د هغوی پلورل شوي ځايي او رټل شوي عناصر ګوماري.
دا چې په نړیوالو غونډو او خبرونو کې کله کله افغانستان ته د خوارجې ددې ډلې د یوه پټنځي په سترګه کتل کېږي، یوه پوچه او بې اساسه ادعا ده، ځکه چې دا د امریکايي یرغلګرو او مل نړیوالې ټلوالې یوه داسې سناریو وه، چې تر سپېڅلو شعارونو او جعلي څېرونو لاندې په یوه او بل نامه د مبارزې صحنې ته د یوې نیابتي ډلې په توګه را اېستلې وه، خو الحمد الله چې په افغانستان کې له بشپړې ماتې سره مخ شوې.
د ماتې په پایله کې یې ځینو بزدلانه حرکتونو ته مخه کړې، چې د مشرانو ترور او کله کله وېره اچونه په کې شامله ده، خو په دې تړاو تر اوسه تر لاسه شوي شواهد څرګندوي، چې دا یوه بېرونۍ پدیده ده، پلانونه او پلان پلي کوونکي یې ټول د افغانستان په ګاونډیو هېوادونو کې پټ دي.
د اسلامي امارت مشرانو په بیا بیا ویلي چې افغانستان باید په یوازې ځان ددغه ناوړه پدیدې قرباني نه شي، بلکې نړیوال هم په دې برخه کې د مبارزې مسوولیت لري، د اسلامي امارت ددې پر ځای ادعا ثبوت په تېر کې بیا بیا خپله وړاندې شوی دی، خو تر ټولو وروستۍ څرګندونې یې پخواني امریکايي چارواکي او د دوحې سولې تړون کې د امریکايي پلاوي مشر زلمي خلیلزاد کړي دي.
هغه څو ورځې وړاندې په خپل ايکس پاڼه لیکلي و: تازه او موثق معلومات لري چې د داعش په څېر خطرناکې ترهګرې ډلې په پاکستان دي، نوموړي همدا راز له اسلام اباد څخه غوښتي چې په خپله خاوره کې ددغه ډلې د پټنځایونو موضوع ته جدي پام وکړي.
د خلیلزاد په خبره « داعش ډله یوازې پاکستان ته نه، بلکې سیمې او نړۍ ته هم خطر دی، نن به ټول پوه شوي وي چې د یو تاکتیک په توګه له ترهګرۍ سره لوبې کول فاجعه زېږوونکی عمل دی او بالاخره به شدت بېرته د همدوی پر ضد وکارول شي.
نوموړي همدا راز ویلي چې د تیرې مارچ میاشتې په منځ کې د بلوڅ وسله والو له خوا د بلوچستان په مستونګ کې د داعش ډلې پر یوه کمپ برید کې ۳۰ داعشیان وژل شول، چې ازبک، ترکي، هندي او تاجکستاني ترهګر په کې شامل و، خلیلزاد لیکلي و چې دا راپورونه سم دي او نور باید پاکستان کې د ترهګرو ډلو موجودیت د پاکستاني نظامیانو او استخباراتو لپاره یوه ناپېژانده موضوع نه وي.
نوموړي دغه وضاحت د پاکستان د دفاع وزیر د هغو څرګندونو په مقابل کې لیکلی، چې د امریکا په اشاره او همکارۍ یې په تېرو درېیو لسیزو کې د ترهګرو ډلو ته ځای ورکړ، خو اوس پرې پېښمانه دي.
د خلیلزاد دې څرګندونو ته په پام سره د افغانستان ګاونډیو او د سیمې ځواکمنو هېوادونو ته په کار ده چې ددغه فتنې په مخنیوي کې یوه خوله او یو موټي شي، ځکه چې که ناورینونه او دا ډول فتنې له وړاندې شنډې او محوه نه شي، د سولې لپاره د یوه نړیوال مسوولیت په سترګه ورته ونه کتل شي، نو یوازې د یوه هېواد قربانۍ او مبارزه یې بنسټیزې رېښې له منځه نه شي وړلی.
دا چې پاکستان اوس مهال تر نړیوال فشار لاندې دی او یوازې د ملامتولو هنر او سیاست مخته وړي، باید دا هم هېر نه کړي، چې بالاخره به د نړۍ حوصله تمامه شي او په دې ناسمه لوبه کې به خپله مسوولیت او تاوان ور په غاړه وي، داعش د هېچا په خیر هم نه دی او همدا یې وخت دی چې رېښې یې پرې شي، د سیمه ییزې او نړیوالې همکارۍ په رڼا کې واقعیتونه درک او او بالاخره د اسلامي امارت د داعش ضد هڅو درناوی وشي.
