د اسلامي نظام د مزاياوو په لړۍ کې، ځینې نورې مهمې ګټې او ځانګړتیاوې هم شته، چې په لاندې ډول یې یادونه کوو.
۲:- له اختلاف، نقص او تضاد څخه پاکوالی
دا چې اسلامي نظام يو الهی نظام دی، نو ضرور به د هر ډول نيمګړتيا، نقص، اختلاف او تضاد څخه منزه اوپاک وي، دا ځکه چې د اسلامي نظام جوړونکی او وضع کوونکی يو کامل او مطلق ذات دی، او د کمال تاثیر دا ايجابوي چې نظام به يې هم کامل وي، د هغو نظامونو په څېر به نیمګړی نه وي، کوم چې د انسان د نيمګړي ذهن محصول دي.
الله جل جلاله په قرآن عظيم الشان کي فرمايي: “وَلَوْ كَانَ مِنْ عِندِ غَيْرِ اللَّهِ لَوَجَدُوا فِيهِ اخْتِلَافًا كَثِيرًا” (النساء: ۸۲)
ژباړه: که دا (قرآن) د الله جل جلاله نه بغیر، د بل چا له لوري وای؛ نو ډېر اختلافات به مو پکښې موندلي وای .
د بشر جوړ شوي نظامونه، لکه ډیموکراسي یا سوشیالیزم، د انساني عقل پر بنسټ دي، چې محدود دی، له همدې امله تل په تضاد او اختلاف اخته وي، خو اسلامي قانون د الله جل جلاله لخوا دی، نو ځکه کامل او له تناقضه پاک دی.
۳:- اسلامي نظام د احترام، اطاعت او اعتماد نظام دی
کله چې یو مسلمان يقين وکړي چې دا نظام د الله جل جلاله له لورې دی، نو دا باور پکښې پيدا کيږي چې اطاعت يي عبادت دی، او مخالفت يې د الله جل جلاله قهر ته لاره ده، په اسلام کي د اولو الأمر د اطاعت په اړه ډېر نصوص راغلي او پکښې تصريح شوي چې د اولو الأمر اطاعت واجب او مخالفت يې ممنوع دی.
الله جل جلاله په قرآن عظيم الشان کي فرمايي: يا ايها الذين آمنو اطيعوا الله واطيعوا الرسول واولی الأمر منکم
ژباړه: اې مؤمنانو! د الله جل جلاله اطاعت وکړئ، د رسول الله صلی الله علیه وسلم اطاعت وکړئ، او د هغو کسانو چې له تاسو څخه د واک (اولو الامر) خاوندان دي، اطاعت وکړئ.
علامه دکتور عبد الکريم حامدي په خپل کتاب (مقاصد القرآن من تشريع الاحکام) کې د دغه آيت په تشريح کي فرمايي: ففيها اشارة إلی طاعة اولی الأمر، و هم الحکام من المسلمين، وکذالک جميع الايات التی تأمر باتباع الرسول وطاعته، بصفته حاکما للمسلمين.
ژباړه: په دې (آیت) کې اشاره شوې ده د واکمنانو اطاعت ته، او هغوی د مسلمانانو واکمنان دي. همدارنګه، ټول هغه آیتونه چې د رسول د پیروي او اطاعت حکم کوي، د هغه د مسلمانانو د واکمن (حاکم) په توګه د مقام له مخې دي.
رسول الله صلی الله علیه وسلم په حديث شريف کې فرمايي: «اسمعوا واطيعوا، وان تأمر عليکم عبد حبشی» رواه البخاری
ژباړه: واورئ او اطاعت وکړئ ، که پر تاسې يو حبشي غلام هم واکمن شي.
۴:- اسلامي نظام د اسارت او غلامۍ څخه د نجات وسيله ده
اسلامي نظام له نورو بشري نظامونو څخه لوړ او د خلاصون لاره ده، ځکه الهي لارښوونې لري او بشر ته تر ټولو غوره نظام وړاندې کوي، الله جل جلاله فرمايي: “أَفَحُكْمَ الْجَاهِلِيَّةِ يَبْغُونَ ۚ وَمَنْ أَحْسَنُ مِنَ اللَّهِ حُكْمًا لِّقَوْمٍ يُوقِنُونَ” (المائدة: ۵۰)
ژباړه: ایا دوی د جاهلیت فیصله غواړي؟ څوک به د الله له حکم نه غوره وي د هغو کسانو لپاره چې یقین لري؟
وضعي نظامونه، لکه د سوسياليزم، ډيموکراسۍ او نورو نظامونو، له نظره د تقنین (قانون جوړونې) او تطبیق له اړخه، د انسان افکارو ته لوړ مقام ورکوي او انسان د هر څه محور ګڼي، خو اسلام برعکس، قانون جوړونه د الله تعالی حق ګڼي، او د بشري تجربو پر ځای، الهي وحیي ته مراجعه کو، اسلامي نظام دا توان لري چې انسان د الهي قانون تر سیورې لاندې له بېلابېلو ډولونو اسارتونو څخه خلاص او نجات ورکړي.
خلاصه دا چي اسلامي نظام د جاهلي نظامونو بدیل دی، دا بشر ته یو کامل، عادل او با اعتماد لاره وړاندې کوي چې هم دنیوي او هم اخروي نجات پکښې دی، لېکن د بشر قوانین له فساد، تبعیض او ظلم ډک وي.
