د پاکستاني رژيم له لوري پر دیني ارزښتونو او په خپله خوښه جوړو کړو مدرسو سیاسي سوداګري څه نوې خبره نه ده، د دغه هېواد پوځي واکمنو او د ملکي حکومتونو ګوښه کوونکو دیکتاتورانو د خپل واک، شخصي ګټو او نړیوالو ظالمانو معاملو لپاره تل هڅه کړې ده چې د خپل تداوم لپاره له دین څخه هم ناوړه استفاده وکړي، په خپله خوښه مفتیان او مدرسې جوړې او بیا یې خپلې سیکولرې نظریې او سیاست ته د دیني اړخ ورکولو لپاره وکاروي، چې تر ټولو وروستی مورد یې هم د جامعه رشید په نامه مفتیانو له لوري د هغه پوځي او پوځي چارواکو نمانځنه یا ستاینه وه چې لاسونه یې د خپل ملت او سلګونه بې ګناه وګړو په وینو سره دي او د نړیوالې ترهګرۍ، داعش خوارجو او نورو فتنو لپاره شپه ورځ د پردیو په خدمت کې لګیا دي.
پاکستاني پوځي رژیم په خپل تاریخ کې د اسلام ضد کړنو تور تاریخ لري چې له بده مرغه بیا بیا تکرار او د پاکستان د مسلمان ولس په تندي یې یو تور داغ اېښی دی. په دې کړنو کې د لعل مسجد په شهادت رسول، د حفصه مدرسې پېښه، د دیني علماوو په پټه او ښکاره وژنه، د عافیه صدیقي پلورل، د تحریک لبیک د غړو ترور او د فلسطین په روانه مبارزه کې د یهودي رژیم څخه دفاع او ورسره د مرستې ټټر وهل هغه څه دي چې سترګې پټول به ورباندې بیخي کبیره ګناه وي.
د افسوس خبره داده چې د مفتي عبدالرحیم په څېر د پوځ اجنټان او تش په نامه مفتیان دغه پوځ ته اسلامي پوځي وايي، د خپلو شخصي ګټو د تر لاسه کولو لپاره په قران او حدیث سوداګري کوي او فتوي ورکوي چې له دغه په اصطلاح اسلامي پوځي سره مبارزه مشروعیت نه لري، د جامعه رشید اجنټو مفتیانو حتی د افغانستان اسلامي امارت په تړاو هم خوله خلاصه کړې او غواړي د پاکستاني ملت په اذهانو کې دا خبره د پوځ او اسلام اباد د رژیم په غوښتنه ځای پر ځای کړي چې ګني هغه اسلامي نظام نه دی، د پاکستان د ټولو جنجالونو مسوول او د ټي ټي پي ملاتړی دی، که څه هم د سپي په خوله اوبه نه چټلېږي، اسلامي امارت د یوه سپېڅلي اسلامي نظام په توګه په ټوله نړۍ کې ځلېدلی او عملا یې د اسلامي نظام په راوستلو سره په افغانستان کې سراسري سوله راوستې او د نیمې پېړۍ روانه جګړه یې درولې ده.
اوس پاکستان د خپلو بدو کښتونو حاصل ګوري، ټي ټي پي خپله د پاکستان داخلي ستونزه او د هغه ظلم او زیاتي پایله ده چې د پوځي منځ کې ځانګړې واک غوښتونکې ډلې پر خیبر پښتونخوا او بیا ټولو غیر پنجابي وګړو تطبیق کړی دی. مفتي عبدالرحیم ددې تر څنګ د خپلو خیانتونو او مانتونو د ضایع کولو اوږد تاریخ لري، فکر یې کاوه چې افغانستان ته په تګ به بیا هم خلک تېر باسي، خو اسلامي امارت تور او سپین ښه پېژني، حق علما او د ای اس ای له لوري جوړ شوي جعلي په اصطلاح عالمان ښه پېژني، ځکه یې هغه ته خپل مقام وښود او بېرته رخصت کړ، ښايي همدا په اصطلاح کسر شان به ددې سبب شوی وي چې جامعه رشید او مفتیان یې د اسلامي امارت پر ضد د پوځي له لاسپیکرونو ناوړه تبلیغات پیل کړي، چې ان شاءالله بېرته به یې تاوان خپله دغه ایمان پلورونکو او د اسلام اباد رېژیم ملت وژونکي پوځ ته اوړي.
بل حقیقت دا دی چې پاکستاني رژیم په خپله اوسنۍ بڼه کې هم له ولسي او د دوی په قاموس کې له دیموکراتیک مشروعیت څخه محروم دی، پخوانی لومړی وزیر له خپلې نږدې ټولې کابینې او ګوندي مشرانو سره په ناحقه بند کې پروت دی، د پوځ مشر له خپل صلاحیت څخه په استفادې خپل واکونه تر لومړي وزیر او ولسمشر هم اوچت کړي چې په غبرګون کې یې د سترې محکمې او پارلمان ګڼو غړو هم استعفاوې کړې، خو د پاکستاني پوځي په کنټرول کې پاکستاني رسنۍ ورباندې پرده اچوي. خو له دې ترخه حقیقت سربېره هم ایمان پلوري درباري عالمان ورته د دین په نامه د مشروعیت جامې ور اغوندي.
دوی دا هېروي چې پاکستاني پوځي د اسرائیلو په ګډون له ټولو اسلام ضد نظامونو او اشغالګرو سره خپلې اړیکې پاللې او د امریکا ولسمشر ته یې د چاپلوسیو او غوړه مالۍ ریکارد له هېچا هم پټ نه دی. په دې حساب هېڅ داسې کوم دلیل نشته چې پاکستاني کرايي پوځ دې اسلامي او حتي د پاکستان ملي پوځ وګڼل شي، بلکي پروژه يي او د کرايي قاتلانو د سیسټم یوه خاصه ډلګۍ ده چې قربانیان یې عام سرتېري دي.
په پایله کې ویلی شو چې جامعه رشید او مفتیان یې یو داسې نظام ستايي چې د نړۍ ټولو یهودو ته یې د ملګرۍ لاس ور اوږد کړی، سلګونه رښتیني عالمان یې ترور کړي، نوم بدي کړي او په بهرنیو هېوادونو پلورلي دي، دوی د هغه پوځ او رژیم نمانځنه کوي چې د خیبر پښتونخوا د سلګونو جوماتو، مدرسو، مکاتبو، عامه المنفعه امکانو او ولسي وګړو د شهادت مسوولیت ور په غاړه دی، هغه پوځ چې د خیبر پښتونخوا په جوماتونو کې سپیان ګرځوي او په قرانکریم باندې ناولي قدمونه ږدي.
دوی باید وپوهېږي چې رښتیني مسلمانان او پاکستان مسلمان ملت هېڅکله هم ددغه درباري مفتیانو او څو مدارسو په غوړه مالۍ نه تېر وځي او نه هم هغه تش په نامه قومي مشران چې حتي خپله کوڅه او محله کې یې هم څوک نه پېژني او د پاکستان د پوځي په ملاتړ او د افغانستان اسلامي امارت ضد نارې وهي، د پاکستان د ملت استازولي کوي. اسلامي امارت له رښتینو عالمانو جوړ شرعي نظام دی او په ولس کې ژوره رېښه لري، هېڅکله به یې هم د ایمان پلورونکو ناوړه تبلیغات کمزوری نه کړي.
