د اسلام په زرین تاریخ کې ځینې سیمې د ځانګړو ډلو او فکري خوځښتونو د راټوکېدو مرکزونه پاتې شوي دي. همدغه ډلې به له خپلو ځانګړو مرکزونو څخه د اسلام او مسلمانانو پر ضد فعالیتونه تنظیمول. د نړۍ دولتونو به دا ډلې د اسلامي دولتونو پر وړاندې د وسیلې په توګه کارولې، د سیمو امنیت به یې ګډوډ کاوه، او خپلو شومو سیاسي او ستراتیژیکو اهدافو ته به د همدې ډلو له لارې رسېدل.
کله چې پخواني خوارج د حضرت علي رضي الله عنه پر ضد راپاڅېدل، پر هغه او نورو مخکښو صحابهوو یې د کفر تورونه ولګول، ځان ته یې خلافت اعلان کړ، خپل خلیفه یې وټاکه، او د مسلمانانو پر وژلو یې لاس پورې کړ. د دوی د خلافت له دعوې هدف د اسلام ساتنه نه، بلکې د مسلمانانو وژل او د حضرت علي رضي الله عنه د مشروع حکومت نسکورول وو؛ هماغه بڼه چې ننني خوارج هم پرې پېژندل کېږي.
دا ټولې کړنې له یوې ځانګړې سیمې څخه تنظیمېدلې چې حروراء بلل کېده. حروراء د خوارجو فکري، نظامي او تنظيمي مرکز و، او همدا وجه ده چې په ډیرو احادیثو کې خوارج په حروریه هم یاد شوي دي. صحابه کرامو رضي الله عنهم خوارجو ته د حروریه نوم ورکاوه، ځکه چې دوی په حروراء کې اوسېدل او له هماغه ځایه یې فساد تنظیموه.
ځیني هغه احادیث چي خوارجو ته پکي حروریه ویل شوي دي: ۱- حَدَّثَنَا آدَمُ، حَدَّثَنَا شُعْبَةُ، حَدَّثَنَا الْأَزْرَقُ بْنُ قَيْسٍ، قَالَ: كُنَّا بِالْأَهْوَازِ نُقَاتِلُ الْحَرُورِيَّةَ…
رواه البخاري، حدیث ۱۲۱۱
۲- أَنَّ امْرَأَةً قَالَتْ لِعَائِشَةَ: أَتَجْزِي إِحْدَانَا صَلَاتَهَا إِذَا طَهُرَتْ؟ فَقَالَتْ: أَحَرُورِيَّةٌ أَنْتِ؟…
رواه البخاري، حدیث ۳۲۱
۳- عَنْ أَبِي سَلَمَةَ وَعَطَاءِ بْنِ يَسَارٍ، أَنَّهُمَا أَتَيَا أَبَا سَعِيدٍ الْخُدْرِيَّ فَسَأَلَاهُ عَنِ الْحَرُورِيَّةِ…
رواه البخاري، حدیث ۶۹۳۱
دا او ورته نور احادیث څرګندوي چې د خوارجو هویت له حروراء سره تړلی و، او د هغوی فساد له هماغه ځایه اسلامي دولت ته متوجه کېده. خوارجو د اسلامي دولت پوځونه په داخلي جګړو بوخت کړل او په دې توګه یې کفارو ته عملي ګټه ورسوله. همدا حقیقت شیخالاسلام ابن تیمیه رحمه الله په روښانه ډول بیان کړی دی: «وكانوا أعظمَ الناس إعانةً للكفار على المسلمين»
(مجموع الفتاوى، 7/284)
یعنې خوارج د مسلمانانو پر وړاندې د کفارو تر ټولو ستر مرسته کوونکي وو. دا حالت په سیاسي اصطلاح کې غیر مستقیم اتحاد (De facto alliance) بلل کېږي.
چي خبر اوږده نشي هدف داده چي پخوانیو خوارجو یو ځانګړی مرکز درلود چې حروراء بلل کېده. ننني خوارج هم خپل شوم پلانونه او موخې له یوې ځانګړې جغرافیې څخه تنظیموي. د ګڼو راپورونو پر بنسټ، دا جغرافیه پاکستان ده. د پاکستان پوځي رژیم د دغو ډلو سره مالي، پوځي، استخباراتي او تبلیغاتي همکارۍ لري. د المرصاد وروستی راپور، چې پکې په پاکستان کې د ۱۱ داعشي عناصرو وژل کېدل یاد شوي، یو ځل بیا دا خبره ثابتوي چې پاکستان د داعشي خوارجو لپاره پټنځای او د نننۍ زمانې حروراء ګرځېدلی دی.
له دې وړاندې هم ګڼ داسې راپورونه خپاره شوي چې ښيي:
د سیمې امنیت د همدې خوارجو له لارې ګډوډېږي، دا ډلې د مسلمانانو پر ضد کارول کېږي، د اسلام ریښتیني بچیان د کفارو له اصلي دښمنۍ څخه مصروف ساتل کېږي.
په نړیواله کچه هم راپورونه شته چې بریدونه له پاکستانه تنظیم شوي او دا هېواد د دغو ډلو لپاره خوندي پټنځای پاتې شوی دی.
د دغو شواهدو پر بنسټ ویلای شو چې پاکستان د نننۍ زمانې نوی حروراء دی. یو ځل بیا له همدې سیمې انسانیت ته، او په ځانګړي ډول مسلمانانو ته، ستر خطر متوجه دی. که پر وخت یې مخه ونه نیول شي، او که له دغو حروریانو سره د حضرت علي رضي الله عنه په څېر قاطع چلند و نه شي، نو پایلې به یې ډېرې خطرناکې وي.
