تېره چهارشنبه د اسد ۲۴ مه؛ چې د ا.ا د فتحې او د امریکايي اشغال د ماتې درېمه کليزه وه؛ د هېواد په ټولو برخو کې په شانداره توګه، د ملت او حکومت له لوري ولمانځل شوه، د افغانستان په تاريخ کې داسې کم پېښ شوي چې آزادي په واقعي توګه لمانځل کيږي، په دې معنا چې پوره خپلواکه او مستقله یو.
تېر شل کاله د اسد ۲۸ مه؛ چې له انګريزانو څخه د آزادۍ ورځ ده، د جمهوریت ادارې له لورې په داسې حال کې لمانځل کېده؛ چې آزادي يې نه پېژنده، د امریکایې ځواکونو شتون او د دوی غلامې ور ته ازادي ښکارېده، په ملت يې داسې ګمان کاوه؛ چې ازادي نه پېژني، د دوی په شعارو تېر وتي دي، خو ملت د ريښتینې ازادۍ اتلان ښه پېژندل، له هغوی سره د ازادۍ په راوستلو کې همداسې اوږه په اوږه ودرېدل لکه نن چې یې لمانځلو کې ور سره ولاړ دي.
د ا.ا.ا له لوري د ازادۍ لمانځنې انداز ډېر جالب وو، خپل معنوي، مادي، سياسي او اخلاقي ځواک يې وښود، په باګرام یا په بله اصطلاح د اشغال مهال نومول شوې کوچنۍ امريکا کې، نظامي رسم ګذشت کول؛ له ځان سره خورا زيات پيغامونه مختلفو مراجعو ته درلودل.
۱- امريکا ته: دا چې په امريکا کې انتخاباتي منډې ترړې دي؛ کانديدان یې د خپل کمپاين او ملت د تېر ایستو په موخه، په افغانستان کې د خپلې ماتې پړه په يو بل اچوي، څه موده وړاندې ټرمپ وويل، چې جوبايډن باګرام پرېښود، که زه وای ما نه پرېښود، د ده په وينا که واک ته ورسېږي، په طالبانو به ومني چې باګرام ور کړي، خو دا په داسې حال کې چې په دوحه کې د اشغال د خاتمې تړون د ټرمپ له ادارې سره لاسلیک شو، که دا کار يې کولای شوای ولې يې ونه کړ؟
د ا.ا.ا په باګرام کې د ازادۍ لمانځنې؛ امريکا/خصوصاً ټرمپ د شيطاني خوبونو د رښتيا کېدو له اُميد منعه کړ، ورته وه يې ښودل؛ چې ستاسو ټانګونه او طيارې په موټرسايکل ناستو طالبانو پسې شاته/پاس په عاجزۍ روانې وې، باګرام اوس د هېواد اصيلو بچيانو واک کې دی، د بيا اخيستو هيلې مو پرې کړئ.
۲- لاسپوڅې ادارې ته: دا هغه باګرام دی؛ چې بابا مو د ټرمپ ليدو ته له ارګ ورغی، خو ټرمپ د خپلو فوځيانو په کتار کې ودراوه، هغه باګرام چې مشران به مو د امريکايانو سلامۍ ته ورتلل، خو نن طالب پکې د هم هغې امریکا ماته او ترې اخيستې آزادي لمانځي، تاسو هم بايد اُميدواره و نه اوسئ، د ا.ا.ا د ملت ارزښتونه ښه پېژني، د خاورې له اهميت خبر دي، تاسو وليدل، چې د ازادۍ د لاسته راوړلو په موخه یې څومره بې ساري قربانۍ ورکړې.
۳- ګاونډيانو/سيمې ته: باګرام زمونږ لپاره ډېر ارزښت لري، هيڅ چا ته یې د اشغال اجازه نه ورکوو، مونږ له پرديو سره خورا حساسيت لرو، د نړۍ سفارتونه په اُصولي/قانوني توګه منلای شو، خو دلته نظامي حضور يې هيڅ کله نه منو، تاسې پوه شئ، چې د افغانستان په اشغال کې د نورو مرسته، به تاسې تباهۍ ته ټېل کړي، هېله ده مؤقف مو وپېژنئ.
خلاصه دا چې طالب ډېر ځيرک سياست مخ ته وړي، د رب په فضل دا انګيرنه چې مسلمان، افغان، سياست او حکومتولي نه شي کولی؛ درواغ او باطله ثابته کړه، څه چې د افغان د محوې په موخه راوړل شوي وو؛ نن د افغان نظامي قوت دی، دښمن دا درک کړې ده؛ چې مونږ ماتې وخوړه، دوی بریالي شول، نور خپلو موخو ته نه شو رسېدای، افغان مسلمان أمت سره يو دی.
