د پاکستان روانه جګړه یوازې یو تصادفي یا عادي سیاسي شخړه نه ده، بلکې داسې ښکاري چې د باورونو او نظریو ترمنځ ژور ټکر پکې نغښتی دی، که د سیمې تاریخي پس منظر او اوسني حالات په دقت وڅېړل شي، نو دا روښانه کېږي چې دا جګړه یوازې د جغرافیې، سیاست او قدرت پر سر نه ده، بلکې د عقیدې، هویئت او ارزښتونو ترمنځ د تقابل بڼه هم لري.
ډېری خلک باور لري چې د نړۍ په بېلابېلو پړاوونو کې داسې پېښې رامنځته شوې دي، چې د انسان له ظاهري تدبیرونو هاخوا پکې د الهي تقدیر نښې لیدل کیږي، د همدې لیدلوري له مخې، د سیمې اوسنی وضعیت هم د عادي سیاسي بدلونونو تر چوکاټ محدود نه دی، بلکې د یوه لوی فکري او عقیدوي بدلون برخه ګڼل کېږي. ځینې علماء دا هم وایي چې داسې ښکاري لکه د تاریخ څرخ چې یو ځل بیا د اسلامي هویت او نظام د پیاوړتیا پر لور ګرځېدلی وي، د دوی په اند، کله ناکله ستر بدلونونه د سختو ازموینو، جګړو او کړاوونو له لارې راڅرګندېږي، په دې بهیر کې مؤمنان د صبر، استقامت او وفادارۍ ازموینه ورکوي، او هغه کسان چې دوه مخي یا متزلزل دریځونه لري، ورو ورو بربنډېږي.
دا هم ویلای شو چې د پاکستان پوځي رژیم روان وضعیت یوازې یوه عادي جګړه نه ده، بلکې د اسلامي فکرونو، ارزښتونو او سیاسي لیدلورو د ټکر یوه بېلګه ده، راتلونکی به وښيي چې دا بدلونونه به د سیمې لپاره کوم نوی باب پرانیزي، خو یو حقیقت روښانه دی تاریخ تل د هغو ملتونو په لاس لیکل کیږي چې د ستونزو پر مهال هوښیارتیا، یووالی او تدبیر غوره کوي.
اوس چې د پاکستان پوځي رژیم د جګړې اور بل کړی او د شخړې نوې پاڼه یې پرانیستې ده، نو څرګنده ده چې د دې جګړې د پای لیک میخ به هم د افغانانو د ارادې، صبر او مقاومت په لاس وهل کیږي، تاریخ څو څو ځله دا حقیقت ثابت کړی چې هرکله د دې خاورې پر خلکو جګړه تحمیل شوې ده، افغانان یې پر وړاندې د تسلیمېدو پر ځای د مقاومت لاره غوره کړې او بالاخره یې د جګړې مسیر بدل کړی دی.
افغان قوم د اوږدې مبارزې او نه ستړې کېدونکي مقاومت اوږد تاریخ لري او د حق، ازادۍ او عزت دفاع د افغانانو د ژوند له هغو ارزښتونو څخه ده چې له نسلونو راهیسې یې ساتنه شوې ده، همدا روحیه ده چې افغانان د ستونزو، فشارونو او اوږدو شخړو پر وړاندې نه ماتیږي، بلکې لا پیاوړي کېږي. د تاریخ پاڼې د افغانانو د عزم، زغم او نه ماتېدونکي مقاومت له بېلګو ډکې دي، داسې نسلونه تېر شوي چې د جګړو په فضا کې زېږېدلي، په هماغه چاپېریال کې لوی شوي او خپل ژوند یې هم د همدې مبارزې په سیوري کې تېر کړی دی، همدې ځانګړتیا افغانان د اوږدې مبارزې او دوامداره مقاومت یو بېلګه ګرځولې ده.
له همدې امله افغانان باور لري چې هره تحمیلي جګړه، که هر څومره اوږده او سخته هم وي، په پای کې به د حق، عزت او مقاومت په ګټه پای ته رسېږي، او تاریخ به یو ځل بیا د دې خاورې د خلکو د استقامت او نه ماتېدونکي ارادې شاهدي ورکړي. په پای کې ویلای شو چې دا جګړه به مؤمن او مسلمان ځواکونه ګټي او له دغه ځایه به لښکرکشي کیږي چې پکې به پاکستان د دغو غازیانو تر قدمونو لاندې کیږي، مونږ د یو ویاړلي تاریخي او د اسلام مقدس دین لپاره د سترو قربانیو ورکوونکي قوم په توګه یو نوي او قوي زرین دوران ته ستنیږو، ان شاءالله.
