د پاکستان پوځي رژيم يو له هغو رژيمونو څخه دی چې تل يې د نړۍ د بې ثباته کولو لپاره دوه مخيزه سياست لوبولی دی، له يوې خوا په قصدي ډول د خپلو نيابتي ډلو په مټ داسې بريدونه پلانوي چې مذهبي ډلې او اقليتونه پرې د پوځي رژيم د ګواښ او دوامداره تعقيب لاندې وساتي؛ خو بلې خوا ته له دې هر څه انکار کوي، ترڅو نړۍ ته څرګنده کړي چې ګواکې پاکستان خپله هم د ترهګرۍ قرباني دی. غوره بېلګه يې د پاکستان په پلازمينه اسلام آباد کې د تېرې شعبان د مياشتې په ۱۸مه چې د دلوې د ۱۷مې نېټې سره سمون خوري؛ د اهل تشيع پر يوه جومات د داعشي خوارجو خونړۍ بريد و، چې په پايله کې يې څه باندې دوه سوه کسانو ته مرګ ژوبله اوښتې وه.
ياد بريد خپله د پاکستان د پوځي رژيم په ملاتړ رامنځته شوی و، ځکه چې د پاکستان د پوځي رژيم له همکارۍ پرته داعش د داسې سترو بريدونو وړتيا او امکانات نه لري. ځکه خو له مذهبي او بې طرفه خلکو پرته نظاميان او د پوځي رژيم کارمندان په داسې خونړيو بريدونو سره هدف نه ګرځوي.
دغه دجالي او دوه مخيزه سياست د دې لامل شو چې پاکستان تل د خطرناکو څپو او ويجاړوونکو برباديو په مرکزي سيمه بدل کړي؛ که له يوې خوا د پاکستان په سترو ښارونو کې خپره شوې چوپتيا وګورو، او له بلې خوا د پوځي جنرالانو ترمنځ ژور اختلافات؛ نو په واضحو ټکو ويلای شو چې دا ټول د همدې دوه مخيزه او سياسي بې ثباتۍ نتيجه ده. همداراز د پاکستان په لويو ښارونو لکه کراچۍ، لاهور او اسلام آباد کې د حکومت پرضد هره ورځ پراخ لاريونونه هم د سياسي محدوديتونو په تړاو راپورته کېږي، چې تر شا يې يوه خاصه حلقه فعاليت کوي او غواړي چې دغه کش مکش همداسې دائمي او تلپاتې وي، څو د جنرالانو د همدې خاصې طبقې سياسي او اقتصادي ګټې پکې خوندي او جاري وساتل شي.
نه يوازې پورتني کړکېچونو، بلکې د بلوڅانو دوامداره مسئله او د وروستيو څو ورځو په جريان کې د پاکستان پوځي رژيم د تېري په ځواب کې د افغان ځواکونو بې ساري ځوابي عمليات، همداراز د افغان ډرونونو بمبارونه، د ټي ټي پي چټک فعاليتونه او بريدونه، همدارنګه د پاکستان تر ټولو خراب اقتصادي وضعيت دا ټول هغه عوامل دي چې د پاکستان د سقوط هيله يې تر بل هر وخت زياته کړې ده.
په داسې حساسو او ازمایښتي شېبو کې، د پاکستان له مسلمان ولس، بانفوذه مشرانو او بيا په خاصه توګه له علماوو څخه په کلکه غوښتنه کوو چې پوځي رژيم ستاسې هیواد د ژغورنې په ځای د هلاکت او بربادۍ په لور روان کړی، دغو پوځي جنرالانو ته اجازه مه ورکوئ چې د څه باندې ۲۵۰ ميليونه کسانو سرنوشت په خپل لاس کې واخلي. تر ډېره دغه مسئوليت علماوو ته راجع کېږي؛ چې تاسې د خپل مسئولانه دريځ له مخې مکلفيت لرئ چې په خپلو سيمو کې د پوځي رژيم پر ضد راپورته شئ او د داعش خارجي ډلي د پاللو، جګړې ته د زمينه سازۍ او د دوه مخيز سياست مخه ونيسئ.
مسلمه امت له تاسې ډېره لويه تمه لري چې د پاکستان مسلمان ولس، درانه علما او اغېزمن مشران به د شخصي او ډله ايزو ګټو پر ځای د امت او ټولو مسلمانانو سترې ګټې په پام کې نيسي، د مسلمان وژنې، کرکې او بې ثباتۍ پر ضد به خپل غږ پورته کوي، او په سيمه کې به د يوه واحد اسلامي نظام د ثبات او بقا لپاره خپل رغنده رول لوبوي.
