د لوی الله جل جلاله په نصرت، د فتنګرو هغه شبکه چې په بلوچستان کې یې د داعش خراسان څانګې په مستقیمه لارښوونه د هیواد په شمال شرق کې یو لړ تخریبي کړنې ترسره کولې، د اسلامي امارت د ځانګړو مجاهدو ځواکونو د بریمنو عملیاتو په پایله کې وځپل شوه او ټول غړي یې ونیول شول.
المرصاد له خپلو کره سرچینو څخه معلومات ترلاسه کړي چې له تېرو دریو ورځو را پدېخوا د هیواد په شمال کې ددې شبکې پر ضد په تخار، کندز، بغلان او سمنګان ولایتونو کې پراخ عملیات ترسره شوي.
په دې عملیاتو کې د دې شبکې ټول غړي نیول شوي دي. وسلې، مرمۍ، لاسي بمونه او چاودېدونکي توکي ترې د ځانګړو مجاهدو ځواکونو لاسته ورغلي دي.
د دې شبکې وروستۍ برید د تخار ولایت په دشت قلعه ولسوالۍ کې په یوه چینایي وګړي برید وو چې چینایي تبعه پکې ووژل شو. له دې مخکې دې شبکې د بغلان ولایت نهرین ولسوالۍ اړوند یوه مسجد کې په ذکر کوونکو برید ترسره کړی وو او له لسو زیاتو کسانو ته یې مرګ ژوبله اړولې وه.
همدغه راز یې د بغلان ولایت په ځینو نورو سیمو کې دیني علماء کرام او مخور شخصیتونه په نښه کړي وو او په شهادت یې رسولي وو. د یادې شبکې ټولو غړو په خپلو جرمونو اعتراف کړی.
د یادونې وړ ده چې ددې شبکې فعالیت د بلوچستان په ایالت کې د داعش خراسان څانګې او د دوی تر شا د ځینو استخباراتي جهتونو د هغې ستراتیژۍ یوه برخه وه چې غوښتل یې د افغانستان په شمال کې ځیني پېښې ترسره کړي، د امنیتي وضعیت په اړه تشویشونه را وټوکوي او ګاونډیو هیوادونو ته هم تشویشونه ایجاد کړي.
پاتې دې نه وي چې د بلوچستان په ایالت کې د فتنګرو د خراسان د څانګې مرکزونه او د تربیت کمپونه وجود لري او هلته د ګڼو اروپایي او آسیاسي هېوادونو اتباع روزل کېږي او که چېرې یې مخه ونه نیول شي نو داسې احتمال شته چې په یو شمېر نورو هیوادونو کې هم خطرناک بریدونه ترسره کړي.
همدغه راز د لوی الله په نصرت، د افغانستان اسلامي امارت د ځانګړو مجاهدو ځواکونو په عملیاتو کې د هغه مسلح جنایي بانډ ګڼ غړي نیول شوي چې د تخار په ولایت کې په اختطاف او په ځینو صرافانو او زرګرانو باندې په بریدونو کې ښکېل وو. یو زرګر، یو صراف او د یو مختطف یو ماشوم ورور یې په شهادت رسولي وو.
د المرصاد د سرچینو له مخې د دوی تر شا هم ځینو پټو جهتونو او کړیو لاس درلود او غوښتل یې چې امنیتي وضعیت ناآرامه او د پرمختیایي او اقتصادي پروژو په اړه تشویشونه ایجاد کړي. ددې جنایي بانډ غړو هم پخپلو جرمونو اعتراف کړی دی.
دې دواړو بانډونو د یو لړ نورو تخریبي کړنو پلانونه هم درلودل چې الحمدلله، د دوی په ځپل کېدو ددې پلان شوو تخریبي کړنو مخه ونیول شوه.
