خونړی یووالی: د اسلامي یووالي د ادعاوو په رڼا کې د داعش د فرقهيي انحرافاتو تحلیل
اسلامي وحدت د اسلام د دین یو له اصلي بنسټونو څخه شمېرل کېږي، چې د ننګونو په وړاندې د مسلمانانو د یووالي، ورورګلوۍ او ملګرتیا په ټینګار سره د اسلامي ټولنې په پیاوړتیا کې د پام وړ رول لوبوي، قرآن عظیمالشان او د محمد صلی الله علیه وسلم روایتونو په مکرر ډول د یووالي اهمیت روښانه کړی او د تفرقې او اختلاف څخه یې ډډه کړې ده.
په اوسني عصر کې، د ګڼ شمېر سیاسي، ټولنیزو او کلتوري ننګونو سره سره، د مسلمانانو ترمنځ د یووالي اړتیا تر بل هر وخته ډیره څرګنده شوې. یووالی، نه یوازې د دیني اصل په توګه، بلکې د یوې عملي اړتیا په توګه، کولی شي د فتنې او د دښمنانو د توطئو د راڅرګندېدو مخه ونیسي، له همدې امله، د اسلامي وحدت د ریښتینې مفهوم پېژندل یو له هغو مهمو مسئلو څخه دی چې جدي پاملرنې ته اړتیا لري.
له بده مرغه، د داعش خوارجو په څېر تکفیري ډلو، چې د اسلامي امت د یووالي ادعا کوي، په عمل کې د اسلامي نړۍ یووالي او انسجام ته تر ټولو لویه ضربه ورکړه، دوی نه یوازې د “وَاعْتَصِمُوا بِحَبْلِ اللَّهِ جَمِيعًا” اصل له پامه وغورځاوه، بلکې د الهي مفاهیمو او اسلامي اصولو په ژوره توګه تحریفولو سره یې د “یووالي” په بڼه خپل اسلام ضد پلان هم وړاندې کړ.
دا تکفیري ډلې، چې د اسلام د دښمنانو په لاسونو کې وسیله شوې، د مذهبي مفاهیمو په اړه دومره غلط فهمۍ وکارولې چې حتی اسلامي اصول یې تر پښو لاندې کړل او اسلامي ټولنه یې د ګمراه کوونکي تبلیغاتو سره له دننه څخه کمزورې کړه، داعش خوارج او د هغې پورې تړلو ډلو، د “اسلامي خلافت تر سیوري لاندې اسلامي وحدت” په شعار سره، په عمل کې د مسلمانانو ترمنځ ویش او نفاق ته لمن ورکړه او اسلام یې لویدیځې نړۍ په وړاندي بدرنګه معرفي کړ.
په قرآن عظیمالشان کې، د امت مفهوم ټولو مسلمانانو ته د مذهبي، کلتوري یا قومي توپیرونو پرته کارول شوی دی. اسلام یو داسې دین دی چې د امت په یووالي ټینګار کوي؛ په سورة آل عمران کې راغلي دي: “إِنَّ هَذِهِ أُمَّتُكُمْ أُمَّةً وَاحِدَةً وَأَنَا رَبُّكُمْ فَٱعْبُدُونِ” مګر داعش د دې الهي مفهوم په سرغړونې سره، اسلامي امت د خپلې داعشي فرقې د حدودو پورې محدود کړ.
د دې تکفیري ډلې د اشخاصو او مشرانو په نظر، یوازې هغه کسان چې په بشپړ ډول د دوی د فکر کرښې تعقیبوي “ریښتیني مسلمانان” ګڼل کېدل او پاتې نور یې د “مرتد” یا “د امت دښمنان” په توګه پېژندل کېدل، دا په داسې حال کې ده چې اسلام تل “اسلامي ورورګلوي” باندې ټینګار کړی او “په یووالي کې اختلاف” یې د یو ذاتي حقیقت په توګه یاد کړی دی.
د داعش د ایډیالوژۍ یوه بله ځانګړتیا د مسلمانانو ترمنځ د مصنوعي سلسلې رامنځته کول وو، دې ویجاړونکې او تخریبي ډلې باور درلود چې یوازې د دوی غړي د اسلام ریښتیني پیروان دي او هر هغه څوک چې له دوی سره متفق القول نه وي او د دوی افراطي ایډیالوژۍ تعقیب نه کړي د محرومیت او حتی مرګ مستحق دی، دا ډول ویش په بشپړ ډول د قرآني اصل “إِنَّ أَكْرَمَكُمْ عِندَ ٱللَّهِ أَتْقَاكُمْ” سره ښکاره تضاد دی.
په اسلام کې، د یو شخص حیثیت د تقوا او اخلاقو له مخې ټاکل کېږي، نه د تکفیري ډلې سره د وفادارۍ له مخې. د دې چلند سره، داعش نه یوازې اسلامي ارزښتونه تر پوښتنې لاندې راوستل، بلکې د تبعیضي سیسټم په رامنځته کولو سره یې د اسلامي امت په زړونو کې د نفاق تخم هم وشینده.
