د داعش پر بنسټونو او کړنو یوه څېړنه
اسلام، لکه څنګه چې له نوم څخه څرګندېږي، د روغتیا، سولې، مهربانۍ او رحمت دین دی، د اسلام ستر پیغمبر حضرت محمد صلیاللهعلیهوسلم د ټولو نړۍوالو لپاره د رحمت په توګه رالیږل شوی و او قرآن عظیمالشان د انسانانو لپاره د رڼا او لارښوونې کتاب دی. دا آسماني دین د مینې او شفقت پراخه ډګر دی چې ټول خلک د عدالت او حکمت په سیوري کې راټولوي.
خو په دې زمانه کې یوه ناوړه او ځانجوړه ډله د «داعش» په نوم راڅرګنده شوه. دوی د سپېڅلي اسلام د ساتنې په ادعا د دې رحمتناکه دین ځلانده څېره په تیارو او تاوتریخوالي ککړه کړه.
داعش ځان د اسلام د ریښتیني استازي په توګه د “خلافت راژوندي کولو” او “جهاد” په څېر شعارونو سره وړاندې کړ، خو کړنې یې د اسلام له اصلي لارښوونو سره هېڅ تړاو نه درلود. اسلام هېڅکله د بېګناه خلکو وژنه، د جوماتونو او مقدسو ځایونو ویجاړول، د خلکو د سر غوڅول او د ماشومانو غلامول نه مني، دغه کړنې نه د قرآن عظیم الشان په ښوونو کې ځای لري او نه د پیغمبر صلی الله علیه وسلم په سنتو کې.
داعش د نا آګاهو ځوانانو د غولولو لپاره له ژورو دیني مفاهیمو څخه ناوړه ګټه پورته کړه. د قرآن عظیمالشان آیتونه یې له تاریخي او معنوي اړخ پرته تفسیر کړل، احادیث یې د خپلې خوښې سره سم تحریف کړل، څو خپل تاوتریخوالی «شرعي» وښيي. دا طریقه د اسلام یوه دروغجنه څېره وه؛ د دیندارۍ نقاب پر شیطاني څېره. دوی غوښتل نړۍ ته قناعت ورکړي چې دا تیاره، رڼا ده او دا تاوتریخوالی، رحمت دی.
خو حقیقت دا دی چې دوی یوازې یوه تیاره سیوری وو، د الهي رحمت پر پراخه ډګر؛ هغه سیوری چې د حقیقت د لمر په راختلو سره حتمي له منځه ځي، له همدې امله، د داعش پر بنسټونو او کړنو څېړنه یوازې سیاسي دنده نه ده، بلکې دیني او انساني مسؤولیت هم دی. موږ باید دغه ناوړه سیوری په ښه ډول وپېژنو، تر څو د اسلام ریښتینې څېره، د رحمت، سولې، زغم او عقل څېره یو ځل بیا نړۍ ته ور وښیو.
دا لیکنه د یوې اوږدې څېړنیزې لړۍ پیل دی، چې هڅه کوي د داعش پدیده له فکري ریښو، تر عملي ستراتیژیو او رسنیز تبلیغاتو پورې وڅېړي، څو د تیارو په لرې کولو او د حقیقت د رڼا په څرګندولو کې یو ګام پورته شي.
