د ۲۰۲۱ کال د اګسټ ٣١مه، هغه ورځ وه چې د امریکا وروستی سرتېری له افغانستان څخه ووت، دا یوازې یوه عادي نظامي وتنه نه وه، بلکې د دوو لسیزو د اشغال پای، د یوې اوږدې جګړې ختم او د افغانستان د سیاسي برخلیک لپاره نوی پړاو وو، د دې ورځې له راتلو سره، اسلامي امارت یوځل بیا د هېواد واک تر بشپړې ولکې لاندې راوست.
د اشغال پای او خپلواکي
د ۲۰۰۱ کال د اکتوبر له بریدونو وروسته، افغانستان د نړیوال ائتلاف تر مشرۍ لاندې اشغال شو او د افغانستان اسلامي حاکم نظام یې دړې وړې کړ. دوی غوښتل ترڅو خپل غربي لاس پوڅی نظام او خپل افکار دلته په بشپړه بڼه پلې کړي، خو دا لړۍ شل کاله اوږده شوه، میلیونه افغانان یې متأثره کړل، په زرګونو ځوانان، مشران او کشران یې شهیدان، معلول او معیوب کړل او د افغانستان زیربنا، اقتصاد او امنیت یې له بنسټه متزلزل کړل.
د امریکا د سرتېرو شړل د افغانستان لپاره یوه واقعیاتي خپلواکي وه، ځکه اوس هېڅ بهرنی پوځي ځواک دلته حضور نه لري او بشپړ واک د اسلامي امارت په ولکه کې دی، طالبان چې کلونه کلونه د ترهګرو په نوم یادېدل او په وړاندې یې له هرډول سپکې او درنې وسلې څخه کار واخیستل شو، اما دا چې دوی د همدې هېواد رښتیني بچیان دي او د الله تعالی په لار او د اشغال د پای په غرض یې خپل سرونه نذرانه کړي ول، نو الهي نصرت د دوی مل شو او اوسمهال د واک پر څوکیو ناست او سپېڅلی شرعي نظام یې حاکم کړی دی.
اشغالګرې آمریکا په افغانستان کې، نه یوازې دا چې انساني او بشري کرامات یې تر پښو لاندې کړي ول، بلکې د همدې ترڅنګ یې هڅه کوله ترڅو د داعش پروژه هم له هر اړخه تمویل او هڅې یې ګړندۍ کړي، داعشي خوارج چې اصلاً یوه غربي او کفري پروژه ده او تل یې هڅه کړې ترڅو د اسلام د رښتینو سپاهیانو او مجاهدینو د جهاد په مخ کې خڼډ وګرځي نو هغوی دې چارې ته په افغانستان کې هم په پراخه پیمانه دوام ورکړی او د اسلامي امارت د مجاهدینو پر وړاندې یې خڼډونه او ننګونې رامنځته کړې وې.
داعش چې د غرب (په ځانګړې بڼه د آمریکا) له بشپړ او هر اړخیز ملاتړ څخه برخمن وو، د اسلامي امارت په بیا راتګ او د امریکا په شړلو، سخته ضربه ولیدله او فعالیتونه یې تر ډېره په ټپه ودرېدل، د اسلامي امارت له راتګ څخه وړاندې، داعش ته د هرډول اکمال او تمویل زمینه د بهرنیو له لورې چمتو شوی وه او پراخه هر اړخیز ملاتړ یې کېده. د همدې ډلې سرتېري په هلیکوپټرونو کې له یوې سیمې څخه بلې سیمې ته انتقالېدل، هر ډول وسله ورکول کېدله، په میلیونو ډالره نغدي مرسته ورسره ترسره کېدلې، په مدارسو، مساجدو، پوهنتونو، کلیو، باڼډو،… کې ورته د تبلیغ او فعالیت پراخه زمینه برابره وه، رسنۍ یې په ولکه کې وې او هر هغه فعالیت یې چې غوښتلو، پرته له کوم ګواښ څخه یې ترسره کاوه.
داعش ډلې هم د پوره او قوي غربي ملاتړ په درلودلو سره، د دې هېواد په وګړو هر اړخیز او نه جبرانېدونکي ظلمونه او تېري وکړل، داسې ظلمونه چې ګویا ډېرۍ کفار به یې هم، د ترسره کولو جرئت او تکل ونه کړي، ماشومان په زانګو کې په چړو حلال شول، قومي مشران او سپین ږیري د ټولو په وړاندې په ماینونو کینول شول او انفجار ورکړل شو، د ځوانانو سرونه پرې او په بازارونو کې نندارې ته وړاندې شول، ښځې په جنسي بردګۍ ونیول شوې، جوماتونه، مدارس، مکتبونه او پوهنتونه په ماینونو والوځول شول، ودونه او خوشحالۍ په ویر او غم بدلې شوې او بالاخره داسې ناوړه او کرغېړنه کړنه به نه وي پاتې چې داعشنه وي ترسره کړې.
خو الحمدلله د اسلامي امارت په بیا راتګ راتګ سره، شل کلن اشغال پای ته ورسېد او د داعش د ملا تیر ونړېد خصوصاً کله چې وروستی امریکایی سرتیری د ۲۰۲۱ کال د اګست په ۳۰مه له دې هېواده بهر شو، داعش له یو خوا د عمل په ډګر کې، خپل رښتینی ملاتړ او اکمال کوونکی له لاس وکړ، دا ځکه هر کله به چې همدا ډله د اسلامي امارت تر فشار لاندې راغله نو په څو دقیقو کې به د هغوی ملاتړ ته، امریکایی الوتکی او پوځیان راورسېدل او له بل خوا، اسلامي امارت په خپلو چټکو اقدامات، وکولای شول ترڅو د همدې ډلې لمن غوڅه او فعالیتونه یې په ټپه ودروي.
دا چې اسلامي امارت د حق لارې لاروی، د ولس رښیتنی بچی او د ولس له هر اړخیز ملاتړ او الهی نصرت څخه برخمن دی نو په خپلو کوټلو ګامونو سره یې وکولای شول ترڅو په ډېر لڼډ وخت کې، د داعش ډلې مشران او غړي له منځه یوسي، مالي سرچینې یې پرې کړي، د جلب او جذب مخه یې ډب کړي، د تبلیغاتو لارې یې خنثی کړي او بالاخره هر هغه څه ترسره کړي ترڅو همدا ډله اوسمهال تش په نوم پاتې شي.
په پای کې ویلای شو چې د اسلامي امارت بیا راتګ، د غربي شل کلن ښکېلاک پای، د اسلامي امارت کوټلی ګامونه، الهي او ولسي نصرت دا ټول هغه څه دي چې د داعش فعالیتونه او لمنه یې غوڅه او له منځه یوړه او په دې هېواد کې له کلونو وروسته، بشپړ امن و سوکالي تأمین کړه.
