مولوي مستغفر الحنفي
نن ورځ ځیني خلک په اهل حق په ځانګړې توګه په مجاهدينو او اسلامي امارت ډول ډول اعتراضونه کوي چې له هغو څخه یو اعتراض يې دا هم دی چې ګواکې اسلامي امارت ولې سل فیصده شریعت او الهي قوانین نه تطبیق کوي؟ ځینې نور بیا دېته ورته ګڼ مختلف اعتراضونه کوي، غواړم په لاندې ډول يې ځواب کړم.
لومړی خو باید د اسلامي شریعت د سل فیصده تطبیق په اړه ووایم، اسلامي شریعت کې دوه ډوله جزاوې (سزا ګانې) شتون لري.
۱_: حدود
حد په لغت کې منعې ته وایي او حدود یې جمعه ده، په اصطلاح کې له هغو جزاوو څخه عبارت ده چې اندازه او جزاء یې له نصوصو (قران او سنت) څخه ثابته وي.
۲_: تعزير
تعزیر لغت کې تأدیب او منعې کولو ته وایي، په اصطلاح کې له هغو جزاوو څخه عبارت ده چې اسلامي شریعت کې ورته د جزاء اندازه او ډول ندی ټاکل شوی، بلکې د دې جزاء ټاکلو حق د وخت امیر او قاضي ته حاصل دی.
هغه خلک چې د سل فیصده شریعت تطبیق په اړه اعتراض کوي، د هغوی مطلب دا دی چې ګواکې په عام محضر کې حدود ولې نه تطبیق کېږي، خبره دا ده محترمو چې د حدودو د تطبیق مسائل ډېر زيات حساس دي، د حد تطبیق په يوې وړې شبهې سره ساقطیږي او خبره تعزیر ته لوېږي، شبه شک ته وايي یعنې که چېرته د یو مجرم په جرم کې ډېر لږ شک هم وو نو حد نه پرې تطبیق کېږي، بلکې تعزیري جزاء ورکول کیږي.
مثلاً د زنا حد یو څوک تطبیقوي نو شرايط یې دا دي چې څلور کسه شاهدانو به د زنا عمل په عین زمان کې داسې لیدلی وي لکه لجرومه په سلاحي کې، بیا د شاهدانو شرایط دا دي چې شاهد به عاقل وي، بالغ به وي، مؤمن به وي، صالح به وي حتا چې ږیره به هم نه وهي، معنا داچې مفسد به هم نه وي، له تورنو خلکو سره به کوم شخصي مشکل نه لري او داسې نور…
نو د زنا د حد د تطبیق شرایط دا دي، فرضاً که دغو شرایطو کې یو هم کم و، نو حد کې شبهه رامنځته کېږي او حد نه جاري کېږي، مثلاً د زنا عمل ترسره شوی، څلورو کسانو بالفعل لیدلی خو څلورو کسانو کې یو نفر فاسق دی، دلته شبهه رامنځته شوه او حد ساقط شو، تعزیر به تطبیقیږي، نو که سړی لږ فکر وکړي نن ورځ د دې شرایطو پوره کېدل بیخي سخت دي حتماً نه حتماً د حد تطبیق کې یوه شبهه وي ځکه نن ورځ د فتنو دور دی، خلک د خپلو شخصي غوښتنو، ګټو او بدیو په اساس د درواغو شاهدي وايي او بل دا چې نن ورځ اکثره خلک د دې وړ نه دي چې د شرعي حدودو په تطبیق کې یې شاهدي ومنل شي.
نو هغه خلک چې په اسلامي امارت دا اعتراض کوي چې اسلامي امارت ولې سل فیصده شریعت نه تطبیق کوي هغوی دې اول داسې شرایط او ثبوتونه موږ ته راوړي چې د یو شرعي حد د تطبیق ټول شرایط په کې پوره وي او اسلامي امارت نه وي تطبیق کړی، بلکې نن ورځ تقریباً ټولو حدودو کې شبهه رامنځته کېږي او شرعي و فقهي مشکل په کې وي، که په کوم یو کې شبهه رامنځته نشي هغه وخت حد هم تطبیق کېږي، ځکه تاسې شاهدان ياست چې اسلامي امارت څو څو ځلې شرعي حدود تطبیق کړي هم دي، لکه د قصاص حد چې په فراه او لغمان ولایتونو کې تطبيق او جاري شو.
اوس به خامخا ستاسې ذهن کې دا سوال او پوښتنه پیدا شي چې تاسې دا په دې دومره وخت کې یو سنګسار تطبیق نکړ، مګر د رسول الله صلی الله عليه وسلم او خلفای راشدینو په وخت کې دا حد تطبیق شوی، د دې خبرې ځواب کې باید ووایم چې د رسول الله صلی الله علیه وسلم او د خلفای راشدینو زمانه خیر القرون (تر ټولو بهتره) زمانه وه، هغه وخت د حدودو د تطبیق شرایط په ډیرې اسانۍ سره پوره کېدل ځکه اکثره خلک صالحان وو، د درواغو د شاهدۍ امکان ډېر لږ و او بله خبره دا ده چې د هغه وخت مجرمینو زیاترو خپله په خپل جرم اقرار کاوه او د حد د تطبیق غوښتنه به یې کوله، ځکه هغوی د جهنم له عذابه وېرېدل، لکه څنګه چې روایت شوي چې يو صحابي نبي کريم صلی الله عليه وسلم ته راغی او ورته ویې فرمايل چې ځما څخه زنا شوې ده، نبي کريم صلی الله عليه ډیرې خبرې ورته وکړې او څو څو ځله يې ځینې وپوښتل چې ګوره زنا به دې نه وي کړې او دېته ورته ډېرې پوښتنې يې ځینې وکړې، خو صحابي ورته وفرمايل چې زنا راڅخه شوې ده، هماغه و چې بیا پرې حد هم تطبیق شو، مګر نن ورځ خبره برعکس ده، خو خلاصه دا چې که چېرته هر قسمه حد وي چې ټول شرایط یې پوره وي اسلامي امارت په دې مکلف دی چې حد جاري کړي او جاري کوي يې ان شاء الله، مګر دا چې د حد شرایط نه وي پوره او یو شمېر احساساتي ځوانان او نيمچه ملايان چې وايي چې ګواکې په دې فلانکي دې حد جاري شي دېته د حد جاري کول نه بلکې صحرايي محکمه وايي، لکه څنګه چې مطبوعاتي کنفرانس کې د اسلامي امارت د دفاع وزیر مولوي محمد یعقوب مجاهد د خپلې وینا پرمهال وویل: د سرتاسري امنیت ټینګښت او د امنیتي ځواکونو پورتنۍ لاسته راوړنې د اسلامي شریعت د بشپړ تطبیق او حکم (بما أنزل الله) برکت دی چې په تېرو ۱۲ میاشتو کې د اسلامي امارت د شرعي محاکمو له لوري په ټولیزه توګه له ۴۶ زره څخه زیاتې جزائي دوسیې حل او فصل شوې دي، له دې جملې څخه (۳۰۳۴۷) قضیې جنائي ملکي، (۱۲۱۸۹) قضیې د عامه امنیت او اداري فساد او (۴۲۶۱) قضیې د نظامي مسنوبینو اړوند دي او په دې ټولو قضیو کې د اسلامي شریعت په اساس حکمونه صادر او فیصلې ترسره شوې دي او زرګونه مجرمين مجازات شوي دي.
د افغانستان مسلمان ملت او د اسلامي امارت ټول مجاهدین باید مطمئن اوسېږي چې موږ به کله هم د اسلامي شریعت په تطبیق کې نه غفلت وکړو او نه به په (بغیر ما أنزل الله) حکم وکړو، زموږ په داخلي او خارجي سیاست کې دوستي او دښمني د اسلامي شریعت د لارښوونو له مخې ده.
موږ د امنیت د ټینګښت په برخه کې د خپل مجاهد ولس له همکارۍ څخه مننه کوو او ستایو یې او ترې غواړو چې د ناوړه امنیتي پیښو د مخنیوي په موخه له خپلو امنیتي ځواکونو سره لا ډېره مرسته وکړي او خپل شرعي او ملي مسئولیت ادا کړي.
همدارنګه د وینا په یوې بلې برخه کې یې وویل: په دوحه کې د اشغال د خاتمې په تړون کې چې کوم تعهد د افغانستان د اسلامي امارت له لوري د نورو په خلاف د افغانستان د خاورې د نه استعمال په اړه ترسره شوی، موږ په خپل تعهد ولاړ یو، کله به هم چاته اجازه ورنکړو چې افغانستان د نورو په خلاف وکاروي او نه به چاته اجازه ورکړو چې د افغانانو له مجبوریتونو استفاده وکړي او افغان ځوانان د نورو په خلاف وکاروي، په دې اړه ټول لازم وقايوي تدابير نيول شوي، موږ د هیچا په خلاف د تعدا اراده نلرو او نه د چا تعدا منو.
یوې خبرې باندې باید عوام خلګ او مجاهدین وپوهېږي، هغه داچې د دوحې تړون د اسلامي امارت لپاره یو منشور او تړون ده چې اسلامي امارت د خپلې اسلامي وجیبې له مخې باید عمل پرې وکړي، مګر تر هر قانون او تعهد مخکې زموږ سره کرښه اسلامي شریعت ده، د دوحې قانون کې چې ویل شوي چې د افغانستان خاوره به د بل چا په ضد نه استعمالېږي د هغه هدف دا دی چې بغیر د اسلام له حکم او ګټې څخه به د افغانستان خاوره د بل چا خلاف نه استعمالیږي، خو کوم وخت چې د اسلام حکم راځي هغه زموږ سره کرښه ده او د دوحې له تړون څخه هغه حکم مستثناء دی، یعنې د دوحې تړون ته د اسلام د حکم مقابل کې اصلاً کوم اهمیت نه ورکول کېږي، د دوحې تړون یوازې د دنياوي ګټو په خاطر به خپله خاوره د چا په خلاف نه استعمالوو، د دې لپاره ده، ګنې په حقيقت کې د اسلام لپاره په ټوله نړۍ کې الحمد الله خوندي او لوی مرکز نن ورځ د افغانستان خاوره ده چې نور وضاحت څخه یې تېرېږم وایي؛ عاقل ته اشاره په کار ده، نو له محترمو عوامو ورونو او مجاهدینو څخه مې دا هیله ده چې ستاسې د مشرانو ټول عمر په علم او جهاد کې تېر شوی دی، هغوی سره تر موږ ډېر د اسلام غم دی او هغوی له موږ څخه په اسلام ډېر پوهېږي، نو هغوی به ممکن یا مصلحت ته ګوري یا هم شرایط به دغه رقم وي موږ باید بې ځایه اعتراضونه او نیوکې ونکړو، باید په خپلو مشرانو پوره اعتماد او باور وکړو.
داچې د اسلامي امارت عظيم قيادت د ښځو تعليم ته د يوې شبهې، فقهې جزئيې او نامساعده حالت له وجې اجازه نه ورکوي، تر څو د شرعي احکامو په تطبيق او اسلامي ټولنې په چاپیریال کې نواقص او مفسدات رامځته نشي، نو پوه شئ چې په بغير ما أنزل الله خو ټول عمر په يو حالت کې هم حکم نه کوي او نه به هم هيڅکله د اسلامي نظام او شرعي قوانينو په تطبیق کې کوم غفلت وکړي، لکه څنګه چې تېره ورځ د دفاع وزیر مولوي محمد یعقوب مجاهد او همداراز أمير المؤمنین شيخ صاحب حفظه الله په خپلې يوې وينا کې فرمايلي و: چې په افغانستان کې حاکم نظام (اسلامي امارت) يو اسلامي نظام دی، دا اميد شته دی چې په آئينده کې به دلته سل فیصده اسلامي نظام جوړېږي، دا نور څومره غېر شرعي او ناروا قوانين چې دي، دا ټول ما د علماء کرامو يوې کمیټې ته سپارلي چې کره کتنه يې وکړي او شرعي چوکاټ ته يې برابر کړي، که په هر قيمت وي موږ به بشپړ اسلامي قوانين او اصول نافذوو، موږ له هر چا سره تعامل هم کوو، خبرې هم ورسره کوو، اما د شرعي اصولو په چوکاټ کې، هيڅکله به داسې وخت رانشي چې موږ دې د شرعي نظام او قوانینو په تطبيق کې غفلت وکړو.
