وخت اخیر دی، زمانه اخیرې پړاونو کې ده، په خپله د رسول الله صلی الله علیه وسلم راتګ د قیامت علامه/ اخیر وخت ده. موږ په دې لیکنه کې په همدې غږېږو، چې د اخیرې زمانې نښې او په اوس وخت کې را برسیره شوې فتنې کومې دي او په وړاندې یې د اسلامي نظام مسئولیتونه څه دي؟
حدیثو کې د اخیرې زماني علائم یوازي د خبرتیا لپاره نه دي ذکر شوي؛ بلکې د تیارېدو په موخه بیان شوي دي او دا د نبي علیه الصلوة والسلام د دې وخت پر مؤمنانو ستر احسان دی.
اسلامي امارت، چې د اسلامي حکومت مسؤلیت لري، باید په څو مهمو برخو کې د وخت د فتنو پر وړاندې عملي ګامونه واخلي، لاندې څو فتنې او د نظام مسئولیتونه راوړو:
۱: د حق او باطل ګډوډ کیدل
په ډیرو احادیثو کې راغلي، چې په اخېره زمانه کې به فتنې ډېرې شي، دومره چې حق او باطل به ګډ کړل شي او خلک به له دینه مخ واړوي.
د اسلامي نظام مسؤلیتونه:
۱:- اسلامي نظام باید د عقیدې د خالص ساتنې لپاره د علماوو او روحانینو رول لا فعال او نور هم قوي کړي.
۲:- د ښوونې او روزنې په نصاب کې د صحیح عقیدې او د فتنو پېژندنې موضوعات ور ځای کړي.
۳:- د باطلو فرقو او ګمراه کونکو افکارو د پیژندنې او مخنیوي په باب منظمې برنامې ترسره کړي.
۲: د فکري او رسنیزو فتنو ازدحام
رسول الله صلی الله علیه وسلم خبر ورکړی، چې د اخېرې زمانې ډېری فتنې به د اورېدو، لیدو او خبرو له لارې خپرېږي.
د اسلامي نظام مسؤلیتونه:
۱:- د رسنیو او انټرنېټ د کنټرول او پالیسۍ سختول.
٢:- د فحشا او فکري فساد مخنیوي لپاره د جدي او کوټلو ګامونو پورته کول.
۳:- د اسلامي دعوت او اسلامي رسنیو پیاوړي کول، چې د امت ذهنونه وقایه کړي.
۳: د ظلم او خیانت عامیدل
په حدیثو کې راغلي، چې د اخېرې زمانې له نښو نه یوه دا ده، چې ظلم به عام شي او په امانت کې به خیانت پیل شي.
د اسلامي نظام مسؤلیتونه:
۱:- د عدلي او قضائي ارګانونو پاک ساتل.
۲:- د هر کاري منصب لپاره د امانت او کفایت شرط عملي کول.
۳:- د شفافیت او کنترول میکانیزم جوړول او بشپړ عملي کول.
۴: کفارو سره لویې جګړې او یهودو سره مقابلې
حدیثو کې د اخېرې زمانې ځینې نښې، له کفارو سره لویې جګړې، یهودو سره مقابلې او د باطلو قوتونو یوځای کېدل، ښودل شوي دي.
د اسلامي نظام مسؤلیتونه:
۱:- د اسلامي پوځ، امنیتي ځواکونو او ولس دفاعي روزنه او نظامي تجهیزات قوي کول.
۲:- د ولس د ایثار او فدا کاری روحیه ژوندي ساتل او د استشهاد د سنګر فعال ساتل.
۳:- د نفیر عام/ عمومي بسیج لپاره زمینه او افکار جوړول.
۵:- د اقتصادي محاصرې او لوږې یادونه
په حدیثو کې د اخېرې زمانې په فتنو کې د کفارو لخوا څخه د اقتصادي محاصرې او لوږې یادونه هم شوې ده.
د اسلامي نظام مسؤلیتونه:
۱:- د کورنیو تولیداتو پیاوړي کول.
۲:- د بهرنیو مرستو پرځای په داخلي منابعو اتکا.
د اسلام اقتصادي نظام جوړول.
۳:- او د تطبیق لپاره یې یو منظم او عصري میکانیرم جوړول.
د ناپوهه مفتیانو زیاتیدل
حدیثو کې راغلي، چې په اخېره زمانه کې به ډېر خلک له علماوو (محققینو او مدققینو) واوړي او د ناپوهانو نه به فتوا اخلي.
د اسلامي نظام مسؤلیتونه:
۱:- د باکفایته او مخلصو علماوو ملاتړ او د هغوی د نظر اورېدلو ته ترتیب برابرول.
۲:- د دیني مشورو د مرکزونو ایجاد، تمویل، مدیریت او فعال ساتل.
۳:- د ناپوهه مفتیانو او علماوو کنترول او د تکړه او برجسته علماوو د شهرت لپاره ښه او تطبیق کیدونکی پلان جوړول.
یوازې د همدې څو فتنو په یادونه مو بسنه وکړه، ځکه چې هم اوس عامې وې، ډیرې دي، اجتماعي دي او بیخي د حاکمیت تر کچې رسیدلې دي. رب العباد ټول امت مسلمه پخپل مرحمت له هر ډول فتنو وساتي.
