د خلافت په وړاندې د اسلامي امت باور له منځه وړل:
د اسلامي امت په معاصر تاریخ کې، یو له هغو سترو مفکورو څخه چې تل یې جهادي خوځښتونو او غورځنګونو ته الهام ورکړی؛ د اسلامي خلافت د تأسیس مفکوره ده، هغه خلافت چې د یووالي، عدالت او د شریعت د حاکمیت د سمبول په توګه، د مسلمانانو په زړونو کې لوړ ځای لري او د هغې بېرته راتګ تل د مسلمانې ټولنې د آرمانونو او خوبونو څخه ګڼل شوی دی.
خو په وروستۍ لسيزه کې، د داعش په نوم د یوې ډلې په راڅرګندېدو دا مفکوره له ژور بحران سره مخ شوه؛ یو داسې بحران چې نه یوازې له بهره، بلکې د امت دننه او د هغو کسانو له خوا ایجاد شوی چې د خلافت د دفاع ادعا یې کوله.
په ۲۰۱۴ کال کې د خلافت په اعلانولو او د ابوبکر البغدادي د “مسلمانانو د خلیفه” په توګه د ټاکلو سره، داعشي خوارج داسې ښکارېدل چې د اسلامي عظمت، شان او شوکت دورې ته د بېرته راستنیدو ژمنه کوي، د اسلامي نړۍ له مختلفو برخو څخه مخلص او لېواله ځوانان د دې ډلې سره په دې موخه یوځای شول چې یوه ریښتینې اسلامي ټولنه جوړه کړي، خو ډېر وخت نه و تېر شوی چې د دې پروژې اصلي څېره څرګنده شوه.
منفورې داعشي ډلې، د پراخو فاجعو په ترسره کولو لکه وحشي عاموژنې، له اسلامي ښوونو سره په څرګند ټکر کې بېساری تاوتریخوالی، د مسلمانانو پراخ تکفیر، د جوماتونو الوځول، د اهل سنتو او شیعهوو بېرحمانه وژنه، د اسلامي آثارو ویجاړول او د امت د علماوو سپکاوی نه یواځې دا چې د ريښتیني خلافت استازولي ونشوه کړای، بلکې د خلافت سپېڅلې څېره یې هم سخته زیانمنه، بدنامه او د شک او تردید سره مخ کړه.
داعش د خپلو شرمناکو کړنو په ترسره کولو سره خلافت په یوه خونړي، بې رحمه او استبدادي پروژه بدل کړ چې د سمې لارښوونې خلافت یا د امت د ریښتینې ارادې سره هیڅ ورته والی نه لري، نو ویلای شو، چې داعش د کفري نړۍ او د اسلام دښمنانو لپاره یو له سترو خدماتو څخه دا وه چې د خلافت په پروژه کې د اسلامي امت باور له منځه یوسي.
اوس که د خلافت د بیا راژوندي کېدو خبره کېږي، د ډېرو مسلمانانو ذهن ته د داعش وحشتونه راځي، هغه مفهوم چې باید د عدالت، ورورولۍ، وحدت او د شریعت د پلي کېدو نښانه وای، نن د یو وېرونکې او بدنامې پروژې په توګه پېژندل کېږي.
لویدیځې رسنۍ د داعش له فعالیتونو په ګټې اخیستنې سره وتوانېدې چې دا ډله نړۍ ته د خلافت د اصلي سمبول په توګه معرفي کړي او په پایله کې یې د خلافت مفکوره د نړیوالو او حتی د ډیرو مسلمانانو په نظر کې له ظلم او افراطیت سره وتړي.
داعش ښايي په ظاهري ډول د خلافت د جوړولو ادعا کړې وي، خو په عمل کې یې د دې مفکورې تر ټولو لوی خیانت وکړ. ځکه چې دې ډلې د سپېڅلي مفاهیمو په بدنامولو سره، د خلافت د بیا راژوندي کولو په لور د هر ډول سالمو هڅو د ځپلو لپاره لاره هواره کړه.
دې کار نن ورځ ډیری حکومتونه او رژیمونه دې ته اړ کړي چې هر هغه اسلامي خوځښت چې د داعش سره د ورته والي په پلمه د خلافت خبرې کوي وځپي او عامه افکار دې شعارونو ته د شک په سترګه ګوري، په پای کې دا ویلی شو چې د داعش پروژه د خلافت د بیا راژوندي کېدو په لور یو صادقانه اقدام نه و، بلکې یو لوی فریب او اسلامي امت ته یو دروند ګوزار و.
دې ډلې مخکې له دې چې د اسلام دښمنانو ته زیان ورسوي، د امت د یووالي بنسټونه یې ولړزول، ځوانان یې د ګمراهۍ او افراطیت په دلدل کې ډوب کړل او تر ټولو مهمه دا چې د خلافت په مفهوم یې د خلکو باور له منځه یوړ.
