د سیمهییزو او نړیوالو اسلامضد ائتلافونو لپاره زمینه سازي:
د داعشي خوارجو ډلې د خپل پیل راهیسې د یوې عادي وسله والې ډلې په پرتله ډېر څه وکړل، دې ډلې د خپلو غیر اسلامي کړنو او هدفمند تبلیغاتو له لارې، په حقیقت کې په سیمهایزه او نړیواله کچه د اسلام او مسلمانانو پر ضد د متحدو جبهو د جوړولو وسیله وګرځېده.
کله چې داعشي خوارجو په عراق او سوریه کې د خپلو خونړیو عملیاتو او بیا په اروپايي هېوادونو کې د پلانشویو بریدونو له لارې د نړیوال وحشت فضا رامنځته کړه، لوېدیځو لویو قدرتونو او د دوی سیمهییزو متحدینو وکولای شول له دې بې مانا ګواښ څخه خورا زیاته سیاسي او نظامي ګټه پورته کړي.
لوېدیځ هېوادونه چې له دې وړاندې په منځني ختیځ کې له مستقیمې نظامي مداخلې سره د خپلو خلکو له پراخ مخالفت سره مخ وو، دا ځل یې د داعشي خوارجو سره د مبارزې تر شعار لاندې څو ملي ائتلافونه جوړ کړل او په اسلامي هېوادونو کې یې خپل پوځي حضور بیا پراخ کړ.
له بلې خوا، هغه سیمهییز حکومتونه چې د اسلامي او انقلابي خوځښتونو له داخلي ګواښ سره مخ وو، د «داعشي خوارجو سره د مبارزې» پر څپه په سپرېدو سره یې وکولای شول خپل سیال اسلامي ډلې او حتی خپل داخلي منتقدین وځپي او له بهرنیو قدرتونو څخه سیاسي او نظامي ملاتړ هم ترلاسه کړي.
بې له شکه، داعشي خوارجو نه یوازې په اسلامي هېوادونو کې د بهرنیو قدرتونو د پوځي حضور لپاره زمینه برابره کړه، بلکې د لوېدیځو هېوادونو او د ځینو سیمهییزو رژیمونو ترمنځ یې د هر ډول خپلواک اسلامي حرکت پر ضد د اتحاد لپاره پلمه رامنځته کړه.
که موږ د «داعش ضد» تر نامه لاندې ائتلافونو نظامي او سیاسي حرکتونو ته لنډه کتنه وکړو، نو دا به روښانه شي چې د دې ائتلافونو اصلي هدف، د هغو څه پر خلاف و چې دوی په خوله بیانول يانې هدف یې له داعشي خوارجو سره مبارزه نه وه؛ بلکې د کړکیچ مدیریت او رهبري په داسې ډول وه چې په سیمه کې د لوېدیځ حضور او ګټې ټینګې شي او د اشغال پر وړاندې اسلامي مقاومت کمزوری شي.
حقیقت دا دی چې لویو قدرتونو د داعشي خوارجو پروژې په کارولو سره وښودله چې هر کله وغواړي، کولای شي د داعشي خوارجو په څیر د ډلو په جوړولو یا رهبري کولو سره یو ګواښ رامنځته کړي او بیا د هماغه ګواښ سره د مقابلې په پلمه، خپل سیاستونه عملي کړي.
نن ورځ د داعشي خوارجو له میداني ماتې وروسته، د هغې فکري پاتې شونې او پټې شبکې لاهم د اسلامي هېوادونو په ګوټ ګوټ کې فعالې دي او لاهم کله ناکله د ګډو عملیاتو او نوي امنیتي تړونونو د توجیه لپاره، د دې ډلې نوم د یو «آماده ګواښ» په توګه مطرح کیږي.
په پایله کې ویلای شو چې د داعشي خوارجو تجربې وښودله چې د اسلامي امت هوښیاري او د دښمنانو د پټو پروژو ژوره پیژندنه، د داسې دسیسو د بې اغیزې کولو یوازینۍ لار ده، دا په دې معنی ده چې تر څو چې مسلمانان یووالی او سیاسي پوهاوی ونه لري، دښمنان به تل د داعشي خوارجو په څیر له وسایلو څخه د اسلام ضد ائتلافونو د جوړولو لپاره کار اخلي او له دې لارې به اسلام ته د زیان رسولو هڅه کوي.
