د امت د علماوو او پوهانو په نښه کول
د داعشي خوارجو یوه ستره شومه موخه د رباني او مخلصو علماوو شهیدانول دي، هغه علماء چې د پیغمبر صلی الله علیه وسلم اصلي ځایناستي او د هغه د پیغام حاملين دي، د اسلام له پیل راهیسې تر اوسه دوی پر دې ناوړه عمل ټینګار کړی دی.
د اوسني عصر خوارجو هم د خپلو پلرونو دې ناوړه کړنو ته دوام ورکړی او د خپل ناوړه تحریک له پیل راهیسې یې خپل لاسونه د ډېرو رباني علماوو په پاکو وینو سره کړي دي.
په دې منځ کې هغه علماء چې تر نورو زیات یې امت مسلمه د خوارجو له شر او فتنې څخه خبر کړی او د هغوی پر وړاندې یې مبارزه کړې، د خوارجو لومړنۍ موخې ګرځېدلي او د هغوی د له منځه وړلو لپاره یې له هر ډول چل او خیانت څخه کار اخیستی دی.
د داعشي خوارجو لخوا د اسلامي علماوو او پوهانو د په نښه کولو یو لوی دلیل د همدغو علماوو لخوا د دې زهرجنې فتنې په اړه روښانول دي، ځکه دې علماوو د تاریخ په هره دوره کې عام ولس د خوارجو له فتنې څخه منع کړی او د خوارجو له څهرې یې د اسلام نقاب لرې کړی دی.
داعشي خوارج هڅه کوي چې د علماوو په نښه کولو سره پر بې خبرو او په ځانګړې توګه په ساده زړه او احساساتي ځوانانو تسلط ومومي او ذهنونه یې په زهرجنو تعلیماتو او پردیو تعلیماتو فاسد کړي.
له همدې امله دا منفوره ډله خپلو ناوړه موخو ته د رسېدو لپاره د علماوو او حق غوښتونکو داعیانو قشر، چې د شپې په تیارو کې د روښانه څراغونو په څېر ګڼل کېږي، شهیدانوي او غواړي چې په اسلامي ټولنو کې جهالت خپور شي.
هېره دې نه وي چې د داعشي خوارجو دا شوم عمل د کفر نړۍ ته یو لوی خدمت ګڼل کېږي، ځکه دوی هم په اسلامي ټولنو کې د رباني علماوو شتون د خپلو شومو پلانونو په وړاندې یو کلک خنډ ګڼي او د دې خنډ د منځه وړلو لپاره یې هر ډول هڅې کړې دي.
د داعشي خوارجو او کفري نړۍ تر منځ بې له شکه داعشي خوارجو زيات کار کړى دى (هغه څه چې کفري نړۍ ترسره کولاى نه شوه داعش يې آسانه ترسره کوي) ځکه هغوى د ناخبره غولېدلو مغزونه مینځلي، د جهاد او استشهادي عملیاتو په نوم یې غولولي، ځانمرګي واسکټونه یې ور اغوستي او جوماتونو ته یې استولي دي.
په داسې حال کې چې کفري نړۍ د تاریخ په اوږدو کې د ډېرو پیسو له لګولو سره سره، بیا هم د داسې دقیقو او اغېزناکو عملیاتو په ترسره کولو کې بریالۍ شوې نه ده؛ هغه عملیات چې اوس یې داعشي خوارج پرته له کوم مزد څخه ترسره کوي.
د دې عملیاتو بېلګه په افغانستان کې د داعشي خوارجو لخوا د رباني علماوو شهادت دی، هغه علماوو چې نه یوازې ځواني، بلکې خپل عمر یې د دې سیمې د خلکو په دعوت او ارشاد کې تېر کړی و او د شلو کلونو په اوږدو کې اشغالګر او د هغوی کورني مزدوران د دوی ته د هر ډول زیان رسولو توان نه درلود.
