د مسلمانانو ترمنځ د اختلافاتو رامنځته کول:
له هغه وخته چې عثماني خلافت ړنګ شو، کفري نړۍ تر نن ورځې پورې هڅه کوي چې مسلمانان بیا سره متحد نه شي؛ ځکه که اسلامي هېوادونه او ځواکونه سره یو شي، دا امت به بېرته خپل عزت، ځواک او عظمت ته ورسېږي، د لوېدیځ او دنیاپرستانو پر وړاندې به یو نه ماتېدونکی قدرت جوړ کړي.
د اسلام دښمنانو تل هڅه کړې چې د بېلابېلو دسیسو له لارې د مسلمانانو او حکومتونو ترمنځ یې اختلاف او تفرقه واچوي او هغوی په ناچیزو چارو بوخت وساتي.
دې هڅو هر وخت توپیر درلوده او په اسلامي ټولنو کې یې بېلابېل رنګونه خپل کړي دي؛ کله د قومي او ژبني اختلافاتو له لارې، کله د سیاسي حرکتونو یا مذهبي جریانونو په نوم، او کله هم د جهادي ډلو تر عنوان لاندې یې هڅه کړې ترڅو مسلمانان یو له بله جلا کړي.
داعشي خوارج هم د همدې هڅو یوه بله پایله ده چې د لویدیځ او د اسلام د دښمنانو له لوري د مسلمانانو د یووالي د مخنیوي لپاره رامنځته شوې، دا هغه منفوره ډله ده چې د لویدیځ له خوا ورکړل شوې دنده یې په خورا بریالیتوب ترسره کړې.
هو! له هغه وخته چې د داعشي خوارجو بدنامې ډلې خپل خیالي خلافت اعلان کړی، تر ننه یې اسلامي امت ته نهجبرانېدونکي ګوزارونه ورکړي او د اختلاف و نفاق زهرجن تخمونه یې کرلي دي، د دوی ناڅاپي ظهور نه یوازې په اسلامي هېوادونو کې، بلکې حتی په هغو غیر اسلامي هېوادونو کې چې مسلمانان پکې ژوند کوي هم ژور اختلافات رامنځته کړي دي.
هغه امت چې د یووالي لپاره یې هڅه کوله، اوس تر بل هر وخت ډېر متفرق شوی دی، دې بدنامو خوارجو د خپل باطل فکر په خپرولو سره د امت د ځوانانو ذهنونه مسموم کړي، نه یوازې یې د اسلامي ټولنو ترمنځ، بلکې د کورنیو ترمنځ یې هم نفاق ته لمن وهلې، دوی ورور له وروره، زوی له پلار او پلار له زوی څخه جلا کړي دي.
هغه کسان، چې د دوی د درواغجنو شعارونو په واسطه غولول شوي، خپل ځانونهیې د دوی وسیله ګرځولې، دوی یو بل تکفیر کړي، د کرکې او نفرت تخمونه یې کرلي او د مسلمانانو ترمنځ یې د ورورولۍ اړیکې پرې کړي دي.
په داسې حال کې چې د ټولو مسلمانانو سره دوستي او د کفارو سره دښمني د رسول الله صلیاللهعلیهوسلم او د هغه د رښتینو پیروانو یو غوره خصلت ګڼل شوی، خو داعشي خوارج او د هغوی فریبخوړلي لارویان د خپلو ادعاوو برعکس، له مسلمانانو سره دښمني لري، خو د اسلام د دښمنانو سره دوستي او ملګرتیا کوي.
دوام لري…
