داعش؛ هماغه پدیده چې د انسانیت ضد او دیني افکارو له خوا چمتو شوې ده، یو داسې حرکت دی چې خپلو شومو موخو ته د رسېدو لپاره به له هیڅ شي څخه ډډه ونه کړي، دا ډله به خپلو موخو ته د رسېدو لپاره هر څه تر پښو لاندې کړي، لکه څنګه چې مو د دوی ډېر لنډ تاریخ کې دا قضیه ولیدله او و مو لیدل چې د دوی لپاره هیڅ شی ارزښت نه لري او استخباراتي موخو ته د رسېدو لپاره به یې هیڅ شی هم مخه ونه نیسي.
په دیني مقدساتو باندې د حملې فکر او په ځانګړي توګه د دیندارو خلکو پر ارزښتونو یرغل، په ډېر لنډ وخت کې د نړۍ په کچه د دې ډلې د مشهور کېدو یو لوی عامل وو، د دیندارو خلکو سره د دوی چلند د نورو افکارو او باورونو په پرتله ډېر سخت و، ګویا راغلي وو ترڅو د دین مخ ونیسي او د بې دینۍ او بې خدایۍ په ځاله کې ځان ته ځای جوړ کړي.
داعش په خپل لنډ حرکت او عمر کې د اسلام پر ضد ډېر ښکاره او پټ بریدونه وکړل چې په دې حرکتونو یې غوښتل د اسلام پاکه لمن بدنامه کړي او هغه خلک چې د دې سپېڅلي دین د عظمت لپاره یې خپل ژوند قرباني کوه، ورڅخه لرې کړي، داعش په ترور او وحشت خپرولو سره، د ټولنې لپاره سیکولري باورونو ته د رسېدو لاره هواره کړې وه.
په هغو سیمو کې چې دا تور او شوم سیوری حاکم وو، خلک د ټولنې له رهبرۍ څخه لرې شوي وو، یو ډېر کم شمېر خلک پرته له کوم ځانګړي صلاحیت څخه د خلکو په اوږو باندې سپاره شوي وو او د خپل خود ساخته قدرت بې قاعدې او بې قانونه واک په لاس کې نیولی وو.
په دې فکر کې ګویا ټول غلامان پیدا شوي وو تر څو د دوی په تورو باورونو باور وکړي او پرته له کوم اعتراض څخه ټول صحیح وګڼي او له هیڅ شي څخه ګیلخ او ناخوښي څرګنده نه کړي.
کله نا کله دا د بادارۍ باور د دې ډلې په فکر کې دومره سیوری اچوه او اچولی و، چې د ځمکې پر مخ ټول انسانان چې د دوی د لید له نظره په مختلفو بڼو باندې پېژندل کېدل، له اسلامي دایرې څخه یې ایستل او یوازې ځانونه یې پر ځمکه مسلمانان ګڼل.
دا بریدونه او حملې چې داعش د اسلام او اسلامي باورونو پر ضد کړې وې، تر یوې اندازې پورې یې د غیر مسلمانو خلکو نظر د دې بې آلایشه او پاک دین د تعلیماتو په اړه بدل کړی وو، مګر د وخت په تېرېدو او د حقاني علماوو او اسلامي مفکرینو او مبارزینو په پوهېدو سره، دا چلند په نړیواله کچه شنډ شو او له منځه لاړ.
کله چې دوی د خپل قدرت او تنظیم په چټک آس باندې سپاره وو او پر خپلو جنګي تجهیزاتو یې ویاړل او فرعون څېر ته یې د خدایي ادعا کوله، په همدغه حال سرښندونکو اسلامي مبارزینو په نړۍ کې د دوی لخوا جوړ شوي باورونه او افکار، له منځه وړل.
فکري مبارزین او مجاهدین په دې برخه کې دومره فعال وو چې د خدای تبارک او تعالی په خوښه ټول هغه افکار او حملات چې د داعش له خوا د اسلام او د اسلام د ارزښتمنو باورونو پر ضد شوي وو، په بشپړ ډول له منځه لاړل او حقیقت د نړۍوالو لپاره روښانه شو.
