په بلوچستان کې له موجودو مرکزونو په استفادې داعشیانو په خپل وروستي برید کې، چې په نوشکي سیمه کې یې ترسره کړی، دوه لېویز پولیس وژلي دي.
د راپورونو له مخې، دا پولیس تېره چهارشنبه د نوشکي په غریب آباد سیمه کې وسله والو ترور کړل او وروسته یې د وژلو مسؤلیت داعشیانو پر غاړه واخیست. ويل کيږي دغه دوه پولیس د هغې حوزې مربوط وو چې له استخباراتي ادارو سره د نه هماهنګۍ له امله یې د داعشيانو د یوې لوژستیکي محمولې د انتقال مخه نيولې وه.
دا پولیس داسې مهال وژل کیږي چې، د سرچینو له قوله، د بلوچستان په مستونګ او نورو سیمو کې اوس هم د داعشیانو ځینې مرکزونه فعال دي او سره له دې چې داعشي خوارج په خپلو دې مرکزونو کې بریدګر روزي او پکې بریدونه پلانوي، بیا هم د پاکستان پوځي رژیم له دې امله سترګې پرې پټوي چې د خپلو مخالفینو پر وړاندې ابزاري استفاده ترې کوي او د غرب د ملاتړ ترلاسه کولو لپاره پروژهيي کار ترې اخلي.
د یادونې وړ ده، څو میاشتې وړاندې د مستونګ پر مرکزونو پراخ عملیات ترسره شول، چې په نتیجه کې یې د یو شمېر بهرنیو اتباعو ترڅنګ لسګونه هغه داعشیان ووژل شول چې مستونګ ته د روزنې لیدلو لپاره راغوښتل شوي وو او پلان دا و چې وروسته له همدې ځایه د سیمې او نړۍ هیوادونو، په ځانګړي ډول افغانستان او غربي هیوادونو ته، د بریدونو ترسره کولو په موخه ولېږل شي. هېره دې نه وي چې په بلوچستان کې د داعشیانو د بریدونو هدف تر ډېره حده هغه کسان پاتې شوي چې عملآ د پاکستاني پوځي رژیم پر ضد په سیاسي او نظامي مبارزه اخته دي.
تېره اوونۍ د افغانستان د اسلامي امارت ویاند ذبیح الله مجاهد په یوه خبري کنفرانس کې ویلي و چې د داعش د خراسان څانګې مشر شهاب المهاجر او د ده نږدې همکاران (عبدالحکیم توحیدي، سلطان عزیز عزام او د داعش له مرکزي څانګې سره د اړیکو تنظیموونکی او په اصطلاح د مکتب صدیق مسؤل صلاح الدین رجب) د پاکستان په خاوره کې موجود او پټ دي او له هماغه ځایه په افغانستان، سیمه او نړۍ کې د بریدونو ترسره کولو لپاره پلانونه جوړوي او ترسره کوونکو ته یې روزنه ورکوي.