لسم لامل چې د پاکستان حکومت به سقوط کوي، هغه د پاکستاني پوځي رژیم پراخ مالي او اداري فساد دی.
د پاکستان د فساد په اړه یوه ملي سروې ښيي چې نږدې ۴۶ سلنه خلک مجبوره شوي دي چې حتا په قانوني کارونو کې هم حکومتي چارواکو ته رشوت ورکړي. همدارنګه، د نړیوال شفافیت سازمان (Transparency International) په لېست کې پاکستان اوس هم ۱۳۵م ځای لري. دا په دې معنی ده چې د پاکستان پوځي رژیم په پراخ فساد کې ښکېل دی.
دا موضوع هغه وخت لا ډېره روښانه شوه چې د پاکستان پوځي رژیم یو برجسته او قوي غړی، فیض حمید، د فساد او د خپل واک څخه د ناوړه استفادې په تور په بند محکوم شو، فیض حمید د پاکستاني پوځي رژیم د استخباراتي سازمان عمومي مشر و. له دې قضیې څخه دا معلومیږي چې پاکستاني پوځي رژیم له مشر څخه تر کشر پورې په فساد کې ښکېل دی.
همدارنګه، په تېرو درې یا څلورو کلونو کې تر ټولو زیات پاکستاني جنرالان او افسران د فساد په تور یا تقاعد شوي او یا هم منفک شوي دي، د پاکستان د حساب ورکولو لوی څارنوال (AGP) په راپور کې د پاکستان د پوځ په برخه کې، په لنډه موده کې، شاوخوا ۲۵ میلیارده کلدارې مالي بېنظمۍ ثبت شوې دي، دا په دې معنی ده چې همدا پیسې حیف او میل شوې دي.
د پیسو نړیوال صندوق (IMF) هم په پرلهپسې ډول راپورونه ورکوي چې د پاکستان پوځي رژیم په پراخ مالي فساد کې ښکېل دی. که څه هم پخوا د پاکستان ملکي حکومت، په ځانګړي ډول د پولیسو په برخه کې، پراخ فساد موجود و، او همدارنګه د پوځ د برخې ځینې منځني جنرالان هم په فساد کې ښکېل وو، خو د فیض حمید قضیې دا روښانه کړه چې اوس د پاکستاني پوځي رژیم لوړپوړي چارواکي هم په فساد کې ښکېل دي.
د پاکستاني پوځي رژیم فساد داسې حالت ته رسېدلی چې سیاسي ګوندونه هم د دوی له پراخ فساد څخه نور په تنګ راغلي دي. د پاکستاني پوځي رژیم اداري فساد دا حد ته رسېدلی چې عمران خان یې زندان ته واچاوه او شهباز شریف یې لومړی وزیر وټاکه.
همدارنګه، ټول پاکستاني عوام پوهېږي چې عاصم منیر د خپل واک څخه په ناوړه استفادې سره، په غیرقانوني ډول، د خپلې واکمنۍ موده غځوي او همدارنګه د سترې محکمې واک هم په غیرقانوني ډول محدودوي.
د پاکستان فساد دومره خطرناک حالت ته رسېدلی چې اوس پوځ او ملکي حکومت په همغږۍ فساد کوي، او د مالي او اداري فساد لپاره پوځ او ملکي حکومت د یو بل مرسته کوي.
په تاریخ کې ثابته شوې ده چې هېڅ حکومت د ظلم او فساد سره دوام نه شي کولی؛ حتمي سقوط کوي.
ښه بېلګه یې د افغانستان سقوط شوی جمهوریت دی، چې د نړۍ ۴۲ سوپر قدرتونو خپل ټول مالي او نظامي کوښښونه وکړل چې د سقوط څخه یې وژغوري، خو ناکام شول، پاکستانی پوځي رژیم، چې فساد یې اوس عادت او کلتور ګرځېدلی دی، حتماً به سقوط کوي.
