هغه ډله چې د “اسلامي دولت” یا د داعش خوارجو په نوم پیژندل کېږي، د خپل بدمرغه پیل راهیسې ډېرې هڅې کړې ترڅو ځان د اسلامي عدالت د بیرغ پورته کوونکي په توګه وړاندې کړي، د دې ډلې مشران او قوماندانانو په خپلو ګڼو بیانونو کې ژمنه وکړه چې دوی به “اسلامي خلافت” بېرته راولي، پرته له ناکامۍ به شرعي قانون پلي کړي، فساد به له منځه یوسي او د مظلومانو حقونه به له ظالمانو څخه حاصل کړي.
دا ژمنې ډېرو هغو ځوانو مسلمانانو ته په زړه پورې ښکارېدې چې د ګوډاګیو حکومتونو له فساد او د اشغالګرو له ظلم څخه ستړي شوي وو، په دې شعارونو سره داعشي خوارجو وکولای شول یو شمېر ساده ځوانان وغولوي، ځکه چې د دوی تبلیغات د الهي کتاب له آیتونو او د رسول الله صلیاللهعلیهوسلم له احادیثو ډک وو؛ خو په غلط، ناسم تفسیر او انحراف سره.
د داعش پورې ټولې تبلیغاتي رسنۍ د یوه داسې مثالي او پرېکنده اسلامي ټولنې عکسونه ښکارول، چې ګواکې هلته بشپړ عدالت او امنیت پلي دی او د شریعت ټول احکام په قوت او قاطعیت سره تطبیقېږي، د خلکو د ملاتړ د راجلبولو په موخه به یې د حدودو د تطبیق صحنې خپرولې، لکه د قصاص اجرا او د غلو لاس پرې کول او ادعا یې کوله چې دا هغه ریښتینی عدالت دی، چې اسلامي نړۍ ورته اړتیا لري.
خو د واقعیت ډګر داسې نه وو، داعش د عدالت د عملي کولو پر ځای، د ظلم، وحشت او بېرحمۍ تر ټولو خطرناکې بېلګې نړۍ ته وړاندې کړې، دوی د حدودو تر نامه لاندې د بېګناه وګړو سرونه غوڅ کړل، ولسونه یې پر درواغو او جوړو شوو جرمونو تکفیر کړل او د هغوی مالونه یې حلال وګڼل، هغه سیمې چې دوی پرې واکمن شول، هلته د امن پر ځای قتل عام، شکنجه، د کورونو ورانول، د شتمنیو ضبط او د خلکو بېکورهوالی څپې خپرې کړې.
داعش د عدالت شعارونه ورکول، خو امنیت او انساني وقار یې له منځه یوړ، هغه د خلافت ژمنه وکړه، خو د ظلم، تاوتریخوالي، تفرقې او تکفیر سره یې د ریښتیني خلافت بنسټونه – چې باید پر اسلامي ورورګلوۍ، عدالت، مشورې او اخلاقو ولاړ وي، ویجاړ کړل؛ دې ادعا کوله چې ملت سره یو کوي، خو په ټوټو یې ووېشل او مذهبي او قومي توپیرونه یې وپارول.
د داعش تر ټولو ستر جنايت دا وو، چې د دوی ډېری قربانیان خپله مسلمانان وو. که دا ډله په رښتیا د کفارو پر ضد راوتلې وای، نو ولې یې ډېری بمي بریدونه، هدفي وژنې او ترهګریزې حملې د مسلمانانو په کوڅو، بازارونو، او حتی جوماتونو کې ترسره شوې؟
ولې د داعش تر کنټرول لاندې سیمو کې زرګونه مسلمانې ښځې او ماشومان ووژل شول یا تېښتې ته اړ شول؟
ولې يې د اسلام په څېره کې د خلکو د سرونو په پرې کولو او په اور اچولو سره نړۍ ته د اسلام څېره دومره بده ښکاره کړه؟
په پایله کې، دا باید ومنل شي چې داعش د عدالت د تش شعار جوړولو او د عدالت په نوم د ظلم د خپرولو لپاره راغی – او دا د اسلام له سپېڅلي دین سره تر ټولو لوی خیانت و.
