دا چې نن سبا د رسنیو زمانه ده، خواله شبکې په پراخه اندازه د خلکو پر ژوند اغېز لري، نو داعشي خوراجو هم د خپلو بادارانو له لوري په ورکړو امکاناتو د لوړې کچې ویډیو سټوډیوګانې او کمرې کارولې دي او حتی د سر پرې کولو، اعدام او نورو وحشي کړنو یا صحرايي محکمو صحنې یې مستندې کړې او خپرې کړې دي.
دا ټول ددې لپاره چې خلک تر تاثیر لاندې راولي او هغه پټه وېره او وجداني عذاب له عامه اذهانو پټ کړي چې دوی له امله د داسې وحشتونو تر سره کولو ته اړ شوي دي، دغه ویډیوګانو ته د داعشي مسوولینو له لوري پراخه کمپاین کېږي او یو شمېر هغه رسنۍ یې هم د ژورنالېزم د ټولو اصولو تر پښو لاندې کولو سره خپروي چې مالي تمویل یې د داعش د ملاتړو په واک کې دی.
دا رسنۍ غواړي چې په دې ډول د اسلام څېره نوم بدې کړي او نړۍ ته وښيي چې دا په اصطلاح مجاهدین او اسلامي کړنې دي چې دې ته د اسلام د تخریب او سپکاوي یوه ګډه استخباراتي پروژه ویلی شو.
داعش د خپلو کړنو او څېر د مثبت تصویر وړاندې کولو لپاره ګڼ شمېر لیکوالان او داسې عالمان هم ګومارلي دي چې په ظاهري څېره مسلمان، عالم او ملا ښکاري، خو په حقیقت کې د خوارجي فکر او فرهنګ لرونکي پردي استخباراتي اجیران او مزدوران دي، د پیسو، امکاناتو او مادیاتو لپاره د دین او ارزښتونو په نوم بندۍ بند نه دي او د راتلونکي په اړه یې هم سوچ نه کوي.
ګڼې داسې مقالې او اعلامیې د داعش اړوندو رسنیو کې شته چې دغه کرايي تش په نامه عالمانو او لیکوالو په پټو سترګو ددغه ډلې په توصیف کې لیکلې او د ځوانانو د ذهنونو د تخریب او بې لارۍ لپاره یې خپرې کړې چې له نېکه مرغه د واقعي مجاهدینو، مسلمانو لیکوالو او فرهنګیانو له خوا په متقابل ځواب او لیکنو کې شنډې شوې او ددغه اجیرانو ناوړه څېره یې بربنده کړې ده.
له بده مرغه چې انټرنټ او خواله شبکې په سراسر نړۍ کې په ځانګړي ډول اروپا کې په انلاین ډول د غړو او مالي ملاتړ د جلب یوه وسیله ده، ځکه د نړۍ ګڼو هېوادونو کې یو شمېر داعش تېر وېستلي د همدې پیغامونو او شعارونو په سبب نیول شوي او ځینو یې په خپله تېروتنو اقرار هم کړی دی، ځکه چې انلاین شبکې تر موبایل او نورو وسیلو دوی ته د پیغام رسولو او غړو د تېر وېستنې لپاره ساده او ارازنه وسیلې دي.
تجربو ثابته کړې ده، چې ټول هغه نهادونه او ډلې چې په پوځي ډګر او مبارزه کې ماتې خوري، بیا د فرهنګي بې لارۍ او اشغال لمنه نیسي، خو د لږ او ډېر وخت په تېرېدو سره یې دا مبارزه هم د پوځي ماتې په څېر د نابودۍ پر درشل درېږي او کومه لاسته راوړنه په لاس نه ورځي، له همدې امله د داعشیانو دا دول کړنې او لیکنې د هغوی د بایللي مرام وروستی تصویر وړاندې کوي چې د نابودۍ پر څنډه ولاړ دی.
