پنځم لامل چې د پاکستان د سقوط سبب کېدای شي، هغه د پاکستاني پوځ د رژیم د دیني عالمانو سره دښمني ده، لکه څنګه چې مخکې مو ویلي و، د پاکستان بنسټ د اسلام په نوم ایښودل شوی و او د پاکستان عوام په ټولیز ډول مسلمانان دي، خو د انګریزانو له خوا په پاکستان کې غیر اسلامي قانون جوړ شو، او د دغه قانون د تطبیق لپاره انګریزانو ډېر هغه کسان د پاکستان د پوځ او حکومت پر سر راوستل چې د اسلام او دین ضد نظریات یې لرل.
که دقیقه پلټنه وشي، نو تر کفارو وروسته به یوازینی حکومت وي چې ډېر دیني عالمان یې په شهادت رسولي دي. همدارنګه په تېرو پنځوسو کلونو کې، تر اسرائیلو وروسته په کفر او اسلام کې یوازینی پوځ د پاکستان پوځ دی چې مستقیماً یې پر مسجدونو حملې کړي دي. د بېلګې په توګه لال مسجد او حفصه جماعت. دا دواړه یوازې د مثال په ډول یادېږي، ځکه ورته لسګونه نور مساجد او مدرسې د پاکستان پوځ بمبار کړي دي.
تر اوسه هم پر یوټیوب داسې ویډیوګانې شته چې د پاکستان پوځ د یوې مدرسې لسګونه کم عمره طالب العلمان ډله ییز شهیدان کوي. په نږدو ورځو کې یوه ویډیو په ټولنیزو رسنیو خپره شوه چې پکې د پاکستان پوځ په مسجد کې نعوذبالله سپي ګرځوي.
همدارنګه د پاکستان پوځ د مولانا حسن جان صاحب په شمول لسګونه ستر دیني عالمان په خیبر پښتونخوا، بلوچستان او سند کې په مرموز ډول په شهادت رسول.
همدا څو ورځې مخکې پاکستاني رژیم لسګونه دیني مدرسې په پنجاب کې وتړلې.
دې کار د پاکستان د پوځ د کرایې عالمانو حیثیت هم کم کړی، ځکه د پاکستان عوام په خپلو سترګو ویني چې د پاکستان ظالم رژیم حقیقي دیني عالمان شهیدانوي، مګر ځینې علماء چې ځان د حق طرفداران بولي د پاکستان د پوځ په ملاتړ فتوې ورکوي.
دا چې حقیقي علماء یا پاکستان شهیدان کړل، یا یې بندیان او ناراضه کړل، او د حکومتي عالمانو اعتبار په ټولنه کې کم شوی، نو اوس د پاکستان د پوځ هغه ستر دروغ افشا شول چې ویل به یې پاکستان د اسلام قلعه ده. نن هر څوک پوهېږي چې دا نعره یوازې د پاکستان د ظالم او مستبد پوځ د واک او اقتدار د ساتلو لپاره ده، او په عمل کې همدا پوځی رژیم د اسلام تر ټولو لوی دښمن دی.
په اسلامي ټولنه کې مسجد او مدرسه د شعائرالله څخه دي، او مسلمانان دیني عالمان په فکري او عقیدوي ډول ډېر درناوی کوي. د دیني عالمانو وژل او شکنجه کول او د مدرسو او مسجدونو ورانول د دوی لپاره هېڅ د زغملو نه دي. همدارنګه دغه کارونه د الله تعالی د قهر سبب ګرځي، نو د پاکستان د پوځ دا عمل د پاکستان سقوط لا نور هم نږدې کړی دی.