په تیاره کې یوازې ستوري ځلېږي؛ د خدای جل جلاله پر دا عظیمه او لویه برخه موجوداتو کې، د ځمکې پر اُفق همدا ستوري ځلېږي، چې د لارویانو او لار ورکو د لارښونې او منزل ته د رسېدو په پار د دوی رهنمایي کوي.
هوکې! د دغه ځلېدونکو ستورو له ځلېدنې، لار ښودونکې ځلا او جهت ښوونې له هنره هغه خلک، هغه کسان او هغه انسانان استفاده کولای شې؛ کومو ته چې همدغه ستر او لوی ذات جل جلاله د دوی په سینو کې د هدایت او لارښونې ډېوه بله کړې وي.
همدغه الهي ډېوه د دغو سپېڅلو او په الهي ډېوه سمبالو رجالو د ځلېدنې، تیارو اوتاریکیو کې د نورو انسانانو د لارې مشال جوړېږي، نو غواړم د همدغې مسیر د ځلانده ستورو له مداره وتلي ستوري؛ پر زوکړې، زده کړو او مبارزې لیکنه وکړم.
د اسلامي اُمت د مېړنیو، نوموتو، نومیالیو، سر ښندونکو او سر سپارلیو اتلانو له کتاره وتلیو غمیو؛ یو یې هم اتل قهرمان د اسلامي اُمت او اسلامي مقدساتو څخه د دفاع په موخه د هر رنګه او هرې دسیسې پر وړاندې لکه سپر ولاړ او له کمان وتلی غشی؛ د دښمن له زړونو او سینو وتلی تیر؛ شهید حافظ زین الله چې په حافظ منصور یې شهرت درلود؛ دی.
۱:- زېږېدنه:
د الله جل جلاله د لارې اتل، قهرمان د کُفر او کُفري دسیسو پر وړاندې د اسلامي اُمت د ګرمو سنګرونو ستړی مجاهد شهید حافظ منصور تقبله الله د مرحوم سورګل زوی، د میدان وردګو ولایت چک ولسوالۍ د بابا قلعې اوسېدونکی، په ۱۳۷۵ هجري شمسي کال د وردګو ولایت بند چک ولسوالۍ د بابا قلعې کلي، د مرحوم سورګل درنې کورنۍ کې دې فاني نړۍ ته سترګې وغړولې.
۲:- زده کړې:
شهید حافظ منصور تقبله الله خپلې لومړنی زده کړې د خپل کلي مسجد کې د کلي له امامه وکړې او بیا یې وروسته د قرآن عظیم الشان زده کړې او حفظ د کابل ولایت پنځمې حوزې اړوند نیازبېک سیمه کې، د ابي ابن کعب رضی الله عنه په دیني مدرسه کې پیل او همدې مدرسه کې د قرآن عظیم الشان د حفظ له دستار بندۍ سر بېره؛ په همدې دیني مدرسه کې اسلامي علوم تر وړې دورې ولوستل.
۳:- مبارزه:
شهید حافظ منصور تقبله الله د خپلو درسونو د تعقیب تر څنګ، د وردګو ولایت سیدآباد ولسوالۍ د شنیز جهاد پروره او شهید پروره دره کې، د الحاج مولوي محمد نبي خالد حفظه الله ډلګۍ اړوند د صلیبي اشغالګرو او داخلي مزدورانو د ستر او نوموتي قاتل او همدارنګه د صلیبي اشغالګرو په تور لېست یا د جایېزو په لېست کې شامل سر ګروپ اتل قهرمان شهید امیرګل قریشي تقبله الله له ملګرو سره جهادي خدمت پیل کړ.
نوموړي د خپلې جهادي مبارزې په جریان کې د خپلو نظامي وړتیاوو د لوړاوي په پار د تیوري وړتیاوو سربېره خپلو او د خپلو ملګرو مجاهدینو فزیکي وړتیاوو د لوړولو لپاره زیات تمرینات تر سره کول، تر څو د دښمن په وړاندې د یو خورا بیدار، ځیرک او مقاوم مجاهد په شکل خپله مبارزه تر سره کړي.
شهید حافظ منصور تقبله الله به په ټولو نظامي عملیاتو کې د خپلو مشرانو او ملګرو تر څنګ د یو با تجربه، زړور او دلاوره مجاهد په حیث رول ادا کاوه.
چونکې زه خپله د شهید حافظ منصور تقبله الله د نظامي وړتیاوو او همدارنګه په نظامي ډګر کې دده د زیاتو سرښندنو، زړورتیاوو، نظامي تکتیکونو او قربانیو عیني شاهد یم؛ شهید حافظ منصور به په هر ډول نظامي عملیاتو او سختو حالاتو کې د مشر او نورو ملګرو تر څنګ د اعتماد یوه پخه او نه نړېدونکې ستنه وه.
شهید حافظ منصور تقبله الله به تل د اسلام او مسلمانانو د هر ډول دښمن پر وړاندې د تر ټولې سختې او کارنده مبارزې تکل درلود.
شهید حافظ منصور تقبله الله د دې تر څنګ چې پر یاده سیمه کې پخپله سپېڅلې مبارزه مصروف وو، په کابل کې د الحاج حمدالله حیدر صیب حفظه الله سره د یو فعال چریکي مجاهد او همدارنګه هلته د ښاري ملګرو لپاره د نظامي توکو او موادو پر برابرولو او ترانسپورت کې د پام وړ برخه درلوده.
د دغه ټولو مصروفیتونو سربېره شهید حافظ منصور د وردګو ولایت سیدآباد ولسوالۍ اړوند د قطعې په تشکیلاتو کې څو ځله د امریاکایي پروژې چې د داعش تر نوم لاندې یې تل د اسلامي اُفق پر لمن ځلېدلي ستوري په کاڼو ویشتلي، د ننګرهار پر اُفق د شیطان د دغه هسکو شوو قطارونو د نړولو په پار یاد ولایت ته سفرونه وکړل او هلته یې په مېړانه او سرښندنې سره د دوی پر وړاندې مبارزه وکړه.
چې اړوندو مشرانو به بار بار د شهید حافظ منصور تقبله الله په تشکیلاتو کې د ګډون غوښتنه کوله، البته دغه سفرونه یا پر دغه تشکیلاتو کې خدمت زیات او له بېلا بېلو مشکلاتو ډک وو، خو شهید حافظ منصور تقبله الله به ډېر په شوق، ذوق، ستر عزم او یوې قوي ارادې په دې تشکیلاتو کې ګډون کاوه.
شهید حافظ منصور د خپلو هم سنګره ملګرو تر څنګ، د اړوندې سیمې له نورو مجاهدینو او همدارنګه اولسي وګړو سره داسې راشه درشه یا تعامُل درلود، لکه دوی چې زیات وخت ملګري پاتې شوي وي، یا یې زیات عمر یو ځای وخت سره تېر کړی وي.
له ټولو مجاهدینو او عامو مسلمانانو سره یې نېکه رویه، حسنه اخلاق او په ټوله کې د دوی خدمت یې له اخلاقي اړخه ځانګړنې وې، له اخلاقي اړخه که څومره هم د شهید حافظ منصور یادونه وشي او یا یې زه په اړه لیکنه وغځوم؛ بیا به هم د نوموړي له اخلاقي بُعد یا برخې څخه مشُت نمونه یې خروار وي.
دا چې د شهید حافظ منصور تقبله الله کورنۍ کابل کې اوسېدله او نوموړی وردګو کې د شهادت تر ورځې مسافر وو، د همدې سیمې له مجاهدینو، ولسي خلکو او په ځانګړي ډول د شنیز درې د پټانخېلو کلي کې له استاد دُر محمد او استاد محمد جاوېد سره چې نوموړی به زیات همدې کورونو کې اوسېدلو، د کورنۍ د یوه غړي په صفت وخت تېر کړ او د همدې کلي په مسجد کې به یې د روژې مبارکه میاشت کې د قرآن عظیم الشان ختم هم کاوه.
د شهید حافظ منصور تقبله الله د ټولې مبارزې، سرښندنو، قربانیو او هلو ځلو یوازینۍ موخه او هدف د الله جل جلاله پر ځمکه د هغه د قوانینو نفاذ او د یو سوچه سپېڅلي اسلامي نظام جوړښت و.
۴:- شهادت:
شهید حافظ منصور تقبله الله د وردګو ولایت سیدآباد ولسوالۍ کې په زیاتو عملیاتو کې د فزیکي حضور تر څنګ، څو ځله د اسلام، مسلمانانو او په ځانګړي ډول په نړۍ واله کچه د اسلامي خوځښتونو او حرکتونو د تضعیف او له منځه وړلو په پار د اېجاد شویو داعشي منحریفینو پر وړاندې د ننګرهار غرونو ته جهادي سفرونه وکړل او هلته یې د دغې منحرفې پدیدې پر وړاندې د اسلام د نورو غازیانو تر څنګ په دغه لویه مقابله کې بارزه برخه واخیسته.
دا چې یادو منحرفینو د غازیانو تر کارنده بریدونو لاندې خپلې د ناهیلۍ سلګۍ وهلې او د نابودۍ پر ګړنګ ولاړ وو؛ نو دې وخت کې اشغالګرو له دوی سره د خپلې همېشنۍ همکارۍ له مخې د مجاهدو غازیانو پر لومړنیو او لومړي خط سنګرونو هوایي بریدونه او همدارنګه شپنۍ چاپې پیل کړې.
چې د دغه شپنیو او هوایي عملیاتو په جریان کې شهید حافظ منصور او هلته مېشت د لومړۍ لیکې غازیان د اشغالګرو د چاپې او هوایي برید ښکار شول؛ چې نوموړی په کال ۱۳۹۷/۸/۲۴ مه نېټه د ننګرهار ولایت خوګیاڼو ولسوالۍ اړوند وزیرو تنګي سیمه کې، د داعشي منحرفینو څخه د دفاع او ملاتړ په موخه د اشغالګرو د یوې نامرده چاپې پر مهال، له زیات مقاومت وروسته د اشغالګرو په یو هوایي برید کې د څو نورو ملګرو سره یو ځای د شهادت لوړ مقام ته ورسېد، نَحْسَبُهم کَذاَلِک وَالله حَسَیْبُهُمْ.
۵:- خاطرې:
د شهید حافظ منصور یوه خاطره انجینر صاحب صفی الله چې نوموړی به د دوی په کور کې اوسېدلو داسې بیان کړه:
د روژې مبارکه میاشت کې به چې کله نوموړي د تراویحو ختم خلاص کړ؛ نو به یې د سیمې د جیدو علماوو، مجاهدینو او مخورو په گډون یو شانداره محفل جوړ کړ، د کلي خلکو او ځوانانو به نوموړي ته جامې او رختونه په تحفه کې ورکړل؛ پر همدې سهار به یې را غږ کړ: انجینر صیب موټر چالان کړه او رختونه له مهمان خانې را واخله، دواړه به لاړو دا رختونه به یې د شهیدانو بچیانو او بې وزله خلکو کورنیو ته تقسیم کړل.
د شهادت یوه خاطره یې د خپل ورور له خولې:
لکه څرنګه مو چې مخکې هم یادونه وکړه، د شهید حافظ منصور تقبله الله کورنۍ او وروڼه کابل کې اوسېدل؛ نو شهید حافظ منصور دا وصیت کړی و، چې ما به همدلته سیدآباد ولسوالۍ د پټانخېلو د کلي اړوند هدیره کې زمونږ د یو بل شهید ملګري فرید احمد چې پر کوچي مشهور وو تر څنګ دفن کوئ.
خو د کورنۍ مور او وروڼو تر زیات اسرار وروسته، چې د هغوی دا غوښتنه وه چې شهید حافظ منصور به دلته کابل کې دفن کوو ور سره و مو منله.
ورور یې ماته کیسه کوله؛ وایي: زمونږ کوڅه کې د امنیت یو لوړ رُتبه کس اوسېده، هغې ته ورغلم همکاري مې ور څخه وغوښته، تر څو زمونږ د جنارې او مراسمو څوک مزاحمت و نه کړي؛ چونکه دغه وخت اوړی و، هوا سخته ګرمه وه او د شهید حافظ منصور هم هلته ننګرهار کې شپې وتلې وې او لا یې له هغه ځایه راوړی نه و، نو یاد کس په ځواب کې راته ووېل چې کوشش وکړئ زیاته ګرمي ده، چې څنګه مو د ورور جسد را ورسېد هسې بغیر له جنازې یې دفن کړئ، ځکه چې ګرمي ده اوس به بیخي خراب شوی وي.
ورور یې وېل ما ورته وويل: چې که رښتیا په حقه شهید شوی وي، خو تر او تازه به وي او که په نا حقه مړ وي بیا به همداسې وي لکه ته چې وایې، وېل یې ده راته کړل:
دا دې ملانو خرافات دي، هر انسان خرابېږي اوس خو بیا بیخي خرابیژي؛ ځکه هلته ننګرهار کې ۴۵ درجې ګرمي ده، پوهیږې کنه؟
وېل یې کله چې د شهید جنازه راورسېده؛ ما ورته زنګ وکړ، چې راشه اوس یې وګوره! دا شهیدان دي؛ چې کله هغه د شهید منصور تقبله الله مبارک جسد ولید په ژړا شو او همداسې سلګیو واخیست او لاړ.
