د ایمان، اخلاص او مېړانې ځلانده بېلګه، د ثابت قدمۍ او نه ستړې کېدونکي جهاد سمبول، د حق د لارې رښتینی لاروی او د توکل څښتن مجاهد؛ شهید الله داد “قصاب” چې په دین دوست مشهور و، د حاجي ایلمراد زوی، په ۱۳۶۴ هـ ش کال کې د جوزجان ولایت د درزاب ولسوالۍ د بتو په کلي کې، په یوه دینداره، متدینه او جهادپاله کورنۍ کې دې فاني نړۍ ته سترګې پرانیستې.
فکري روزنه او د جهاد لور ته تګ:
په ګران وطن کې، لکه د نورو هېوادوالو په څېر چې د اشغالګرو او د هغوی د لاسپوڅو تر ظلم او وحشتونو لاندې یې سکون او ارامي له لاسه ورکړې وه، شهید الله داد هم په هغه تنګه او ځپونکې فضا کې ارام ونه موند. د هغه ټینګې عقیدې او راویښ وجدان اجازه نه ورکوله چې د دومره بې عدالتۍ پر وړاندې چوپ پاتې شي.
همدا د مسئولیت ژور احساس و، چې هغه یې د سپېڅلي جهاد له کاروان سره یوځای کړ، او په ۱۳۹۲ هـ ش کال کې د اسلامي امارت د مجاهدینو له صفوفو سره مل شو.
په جهادي ډګر کې شخصیت او کارنامې:
شهید دین دوست یوازې یو عادي سرتېری نه و؛ بلکې یو رهبر، یو بېلګه، او د خپلو همسنګرو لپاره یو بې ریا، بااخلاص او د باور وړ ملګری و. هغه کلونه، کلونه په اخلاص، مېړانې او ثبات د اسلامي امارت د مجاهدینو په لیکو کې د نه ماتېدونکې شازلمي په څېر ودرېد.
هغه یو حلیم، متقي او د ښو اخلاقو څښتن مجاهد و. د خلکو په زړونو کې یې ځانګړی ځای درلود؛ ځکه چې خپله هم د خلکو، دین او اسلامي خاورې د خدمت رښتینی محب و. ساده ژوند، تواضع او همېشنۍ موسکا یې د هغه څېره لا روښانه او خوږه کړې وه.
د دښمن د پوستو د ازادولو په برخه کې، په ځانګړي ډول د قوشتېپې په نښتو کې، د هغه بې سارې زړورتیا د ټولو پر خولو وه؛ تر دې چې ان د لرګي په امسا یې هم د ملحدینو له لاسه پوستې بېرته ونیولې. دا د هغه د لوړې روحیې، قوي ایمان او پر الله تعالی د پیاوړي توکل څرګند ثبوت و.
د شهادت کیسه او تاریخي اهمیت:
شهید الله داد قصاب (دیندوست) تل په زړه کې د شهادت ارمان درلود، خو رب العلمین یې دغه ارمان هم پوره کړ، له یو عمر ستړیاوو، زحمتونو، لوږو او تندو وروسته، په ۱۳۹۳ هـ. ش کال کې د چکانه په سیمه کې د شهادت ستر مقام ته ورسېد.
نحسبه کذالک والله حسیبه
دا هغه وخت و چې د داعشي خوارجو له خوا د درزاب ولسوالۍ په چکانه او آقسای سیمو کې جګړه پیل شوه.
دا د یادې ولسوالۍ په تاریخ کې د داعشیانو لومړنی ظهور او لومړنۍ جګړه وه، او په همدې سپېڅلې مقابله کې لومړنی شهید هم الله داد قصاب و. د هغه پاکه وینه د بشر د تر ټولو ناوړه شقیانو په لاس تویې شوه، خو د هغه شهادت د باطل د ماتې پیل و.
تلپاتې یاد:
شهید الله داد قصاب د الله او د هغه د رسول ﷺ په لاره کې خپل ځان قربان کړ، تر څو د «لا إله إلا الله» بیرغ د دې خاورې پر سر هسک او رپېدلی پاتې شي. هغه له ځانه تېر شو تر څو ضميرونه ویښ او ژوندي پاتې شي، او خپل ځان یې قربان کړ، تر څو اسلام عزت ومومي.
د هغه شهادت د پاکو زړونو لپاره دروند ټپ و؛ خو د الله په توفیق، د هغه کاروان تم نه شو. د ملګرو دوامداره مبارزې د قاتلانو او جنایتکارانو خولې لا پسې تورې کړې، او له هغوی څخه سخت غچ واخیستل شو.
د درزاب ولس به د شهید دین دوست یاد او نوم تلپاتې ساتي. د هغه یاد او خاطرې به د دې خاورې د جهاد په تاریخ کې د تل لپاره ثبت وي، او د راتلونکو نسلونو لپاره به د الهام سرچینه وي.
اللهم تقبله من الشهداء، وارفع درجته في عليين.