په نړۍ کې د اسلام له ظهور څخه مخکې انسانان په یوه داسې نه ختمیدونکي بدلون کې ډوب شوي وو چې له هغې څخه د وتلو هیلې یې په بشپړه توګه قطع کړې وې.
قومي او ژبني جګړې روانې وې، کلونه کلونه يې د خپلمنځي شخړو له امله يو بل وژل، د ځوانانو وينې هدر شوې، ضعيف او کمزوري خلک د مغرورو او زورواکو غلامان وه او هر رنګ چې به يې زړه غوښتل فلک به يې پرې چلاوه.
غلامي او د انسانانو پېر او پلور عادي خبره وه چې نړيوال جواز يې درلود، په پلرونو غرور او وياړ د ژوند له سترو مسايلو څخه و، بالاخره انسانيت خپل رنګ او بوى له لاسه ورکړى و او ملتونه نه پوهېدل چې څه وکړي؟! او د کوم هدف لپاره ژوندي دي؟! او دوی باید څنګه ژوند وکړي؟!
خو د ګران اسلام په راتګ سره هر څه بدل شول؛ هر ګل په خپل ځای وده وکړه او خپل بوی يې د نورو پوزو ته ورساوه.
د ياد لمر په راختلو سره د ځوانانو وينه د اسلام دين د پرمختګ او د لويو يرغلګرو، ظالمانو او د نړۍ د زبرځواکونو پر وړاندې د خداى په لاره کې د مبارزې لپاره تويېدله چې نه يوازې ثواب و بلکې د اسلام منونکي د شهادت په لور د پتنګانو په څیر الوتل.
ګران اسلام ټول هغه څه له منځه یووړل چې انسانیت ته یې ضرر کاوه او په دې توګه یې په ځمکه کې کلونه کلونه خلافت تاسیس کړ.
په دې لړ کې معاندينو او د يهودو او نصاراوو هغه لاسپوڅو ډلو چې اسلامي جامې يې اغوستي وې خو د اسلامي حکومت، مسلمانانو او يا هغه کفارو پر ضد چې زموږ اسلامي شريعت يې له وژلو او ځورولو منع کړي ده بلکې د هغوی د ساتنې امر يې راته کړی دی داسې وحشیانه او د اسلامي شریعت له روحیې سره په ټکر کې کړنې ترسره کړې چې پایلې او لاسته راوړنې یې پرته له دې چې خلک له قرآن او اسلامي شریعت څخه متنفر کړي او اعمال يې د اسلام د داعيانو د دعوت په لاره کې خنډ وګرځي، بل څه نه و.
تر دې چې په اوسني عصر کې د اسلام او شرعي احکامو د دښمنۍ او بدنامولو مسووليت د «داعش» په نوم د يوې ډلې غاړې ته ولويد چې له لومړۍ ورځې چې راڅرګنده شوې ده، داسې کړنې او چلندونه يې تر سره کړي دي چې د اسلام انځور ته د زيان رسولو او د کفري قومونو د کرکې سبب شول.
په داسې حال کې چې اسلام د عامو کافرانو، سوله خوښوونکو او بې وسلې خلکو وژل منع کړي دي او دا ثابته نه ده چې رسول الله صلی الله علیه و سلم له داسې خلکو سره جګړه کړې وي خو داعش هیڅ یو عرب، افغان، کرد، سني، شیعه او نور مسلمانان، اسلامي او سیکولر ګوندونه پرې نه ښودل.
داعش نه يوازې دا چې اسلام او اسلامي امت ته يې هيڅ خدمت و نه کړ بلکې د مسلمانانو پر اسمان يې د قهر او غضب زياتې وريځې خپرې کړى او د هغو خلکو په سترګو کې چې له اسلام او احکاماتو يې ناخبر وو د کرکې يو اغېزمن عامل شو.
بې له شکه چې د دغې ډلې له خوا تر سره شويو وروستيو پېښو په مستقيم او غيرمستقيم ډول سيکولر او اسلامي ضد ګوندونو ته په آزاده او بې غرضه توګه ستر خدمات وړاندې کړی دي ځکه چې دوی له خټو اوبو څخه کبان نیسي او خپل تبلیغاتي او اسلام ضد فعاليتونه یې څو چنده زيات کړي دي؛ خلکو ته وایې چې اسلام د ژوند لپاره له ځان سره منظم پلان نه لري، اسلام په نننۍ نړۍ کې د عملي کولو وړ نه دی او د خلکو له وژلو پرته بل څه نه لري، په مثالونو او شواهدو کې د داعش فعالیتونه وړاندې کوي تر څو خلک د همدغو دیکتاتورو کمونیستي حکومتونو او سیکولریزم څخه راضي شي او د ځان لپاره د خلاصون لاره نه ویني -لکه د اسلام څخه مخکې دوره کې- او دوی مجبور دي د نړۍ زبرځواکو ته د غلامۍ سر ټیټ کړي.
دا د دښمن هدف دی چې تر ډیره حده د دې ډلې لخوا پوره شوی دی.
په پایله کې ویلای شو چې اسلام له اولې زمانې څخه بيا د نړۍ تر پايښت پورې چې په هر ګوټ کې وي، بې دښمنه پاتې نه و او نه به پاتې شي بلکې تل به د دښمنانو د تیغ په وړاندې جنګیږي، داعش هم یوه له هغو ډلو څخه ده چې په مستقیمه یا غیر مستقیمه توګه د حقيقي اسلام له روح او روان سره دښمني لري او نن ورځ په مستقيمه بڼه د امریکا، لویدیځ، پاکستان، ایران او تاجکستان له لارې د مسلمانانو او اسلامي آرمانونو پر ضد کار کوي.
پورته ذکر شوي هيوادونه د همدې ډلې څخه په استفاده چې د پاکستان په بلوچستان کې ځاى پر ځاى شوې ده، د خپلو سیمه يېزو دښمنانو په مقابل کې په تېره بیا د افغانستان د اسلامي حکومت په مقابل کې چې یو نوی حکومت دی او د اسلام د دښمنانو د هیلو په وړاندې فعال دى، د خپلو شومو اهدافو د پوره کولو لپاره د یوې وسیلې په توګه کار اخلي.
داعش نن د سیمې او نړۍ هېوادونو او په ځانګړې توګه له افغانستان سره د جګړى او دښمنۍ په ابزار بدله شوې ده چې وخت په وخت د دغو درې واړو هېوادونو له خوا د تاجکستان او پاکستان اتباع له پاکستان او ایران څخه افغانستان ته داخلېږي او یا نورو هېوادونو ته استول کېږي خو باید ووایو چې دښمن به د خپلو مخکنیو همفکرو غوندې په پخوانیو پلانونو کې چې د افغان ولس او یا نورو پر ضد یې طرحه کړي وو، ناکامه شي. ان شاءالله