محمد ابراهیم مخلص
مادیات په ټوله نړۍ کې یو لوی هلاکوونکی شاخص او فکتور دی، اکثره د ټیټې او لوړې رتبې خلک مادیاتو مات کړي او ماتوي یې حتی تر دې پورې چې داسې خلک په تیرو لسیزو کې تیر شول چې د مادیاتو په مقابل کې یې خپل ایمانونه پلورلي او له لاسه ورکړي دي. هو موږ دا نه وایو چې مادیات هیڅ مهم او ضروري نه دي او یا دې دا ممکنه وي چې د معنویاتو پر قناعت دې د ژوند ټولې اړتیاوې پوره شي، همداراز د دې برعکس یې هم نه وایو چې ټول ژوند د مادیاتو د پیدا کولو لپاره په هڅه او کوښښ کې تیر شي هغه هم پرته له دې چې ټولې پیسې او مادیات ماته حلال دي او که حرام بس چې فقط لاسته راوړل شي.
اعتدال او میانه روي د اسلام د مبارک دین یوه خاصه ځانګړنه ده، دا مبارک دین ټول خلک میانه روي او اعتدال ته رابولي، افراط او تفریط څخه یې منع فرمایلې ده. موږ او تاسو ټولو ته بهتره معلومه ده چې د عربي نړۍ مسلمانان په اوس وخت کې د ښه وس او قدرت خاوندان دي او تر ډیره د مسلمانانو سترګې دوی ته وراوړي چې ګوندي دوی یو څه وکړي ځکه جزیرة العرب هغه ځای و چې د اسلام بنسټ په کې ایښودل شوی او خلک یې ټول د دین د علم په ګاڼه سمبال وو ځکه چې دوی په هغه وخت کې غربي فکر او مفکوري ته ځان نه تسلیماوه او نه یې له یهودو او کفارو سره د شریعت په بدل کې معامله کوله. په اوسني عصر کې خو دوی د کفارو په اشارو نڅیږي، هغوی چې څه ورته وایي دوی یې د مادیاتو، نفسي خواهشاتو او عیاشۍ په بدله کې ورسره مني او تر سره کوي یې، دوی (اوسنیو عربو) د نړیوالو سیلانیانو د راجلبولو لپاره داسې د (عیاشۍ او فحاشۍ) عصري ښارونه او مرکزونه جوړ کړل چې نړیوال به ورځي او هلته به په کې کلتوري جشنونه نیسي، همدارنګه د کفارو او یهودو د پالیسۍ مطابق هغه عرب علماء چې د دوی په عیاشۍ او فحاشۍ یې د ناروا فتواګانې ورکولې هغه یې ټول بندیان کړل او تر اوسه پورې په زندانونو کې د بې عزتۍ شپې سبا کوي او دیته انتظار دي چې کله به له دغه زندان څخه آزادیږي، همدارنګه د دوی لخوا د کفارو او یهودو د خبرو منلو یو لوی حقیقت دا هم دی چې دوی نجونې په لویو لویو کنسرتونو کې نڅوي کفار او یهود پرې پيسې شیندي، عرب ښځې یې سرتور سر او نران یې ټول سپينې لوپټې تر سر تاو ورته ناست وي او چک چکې ورته وهي نو له دې څخه معلومیږي چې د اوسنیو عربو قیادت د داسې چا په لاس کې دی چې په پوره عیاشۍ او خپلو نفسي خواهشاتو او مادیاتو د تیرو نیکونو کارنامو د بیا راژوندي کولو له غیرت څخه په پوره معنا لرې ساتلي دي.
لکه څرنګه چې صهیونیستي رژیم غواړي چې فلسطین د نړۍ له نقشې څخه محوه کړي نو اوسني عرب په دومره حساس وخت کې چې ځانونه ورته ښه مسلمانان ښکاري، هلته په (فلسطین) باندې د صهیونیستي رژیم (اسرائیلو) له لوري پر عامو بې وزله مسلمانانو باندې ړندې بمبارۍ کیږي، په زرهاوو مسلمانان شهیدان شوي او په زرګونه نور ټپیان او زخمیان شوي دي او د ظلمونو او وحشتونو دا سلسله لا هم روانه ده مګر دوی (اوسني عرب) لکه مخکې چې د غفلت په خوب ویده وو اوس هم همداسې ویده پاتې دي، اوسني عرب نسل هغه خلک دي چې مادیاتو (نفسی خواهشاتو، عیاشیو، فحاشیو) دومره وښویول او د غرب فکر داسې نخرې پرې وکړي چې خپل تیر صالح اجداد او نیکونه یې هیڅ یاد نه کړل بلکه د هغوی معکوسه لاره او طریقه یې غوره کړله، د دوی تاریخي کارنامې یې له خاورو سره خاورې کړې، داسې افعال یې تر سره کړل چې ځانونه یې ټول کفارو، یهودو او نصاراؤ ته وشرمول، دوی د څه شهرت او کفارو ته د باور د پیدا کولو لپاره چوپه خوله پاته دي، د فلسطین له مجاهدینو سره مالي، نفسي او فزیکي مرسته نه شي کولای بلکه اسراف ته یې مخه کړې ده. د دوی یو شهزاده په هوایي میدان کې طیارې ته د سرو زرو په زینو د خپل شوق او ذوق د تر لاسه کولو لپاره پورته کیږي مګر د اسلامی نړۍ خاصتاً د (فلسطین) د مظلومو مسلمانانو، ماشومانو او ښځو د مظلومیت چیغې او آهونه دوی نه اوري، همدارنګه د بغداد په کوڅو کې خلک او ماشومان د لوږې له لاسه مري، د یوې ګوله ډوډۍ د پیدا کولو لپاره شپې سبا کوي. اوسني عرب چې د عیاشۍ او فحاشۍ په دامونو کې ښکیل دي، داسې کارونه وکړل چې یهودو او عیسویانو ته یې د خپلې خاورې د ساتنې لپاره هډې ورکړي، پداسې حال کې چې دا داسې یوه خاوره وه چې ساری یې په ټوله نړۍ کې نه و، له دې پاکې خاورې څخه به د نړۍ کونج ـ کونج ته د اسلام پاسدارانو او سپاهیانو د خپلو سرونو په قربانولو سره د اسلام مبارک دین تر سپین محمدي بیرغ لاندې رسولو او نشرولو او د ټولې نړۍ هر کونج ته فاتحانه تلل مګر اوسنی حال یې دا دی چې د خپلې خاوري د ساتنې غوښتنه او تقاضا د اسلام د دښمنانو(کفارو، یهودو او نصاراوو…) څخه کوي عجیبه خو دا ده چې د عربو د یو عالم له خولې داسې اعتراف کیږي چې دوی د کفارو خبري داسې منې لکه د رسول الله(ص).نعوذ بالله
پخوانیو عربو یو وخت کې داسې دبدبه او رعب درلود چې ساری یې د نړۍ په یو هیواد کې هم نه و، یو غښتلی او زړور صحابې ضرار ابن الازور رحمه الله چې به کله د جنګ ډګر ته ښکته شو نو خپلې جامې به یې له مبارک بدن څخ لیري کړې، د دي لپاره چې بیا به د اسلام د مبارک دین دښمنان وایي چې د تورو، غشو او خنجرونو له ډاره یې تر جامو لاندي زغره آغوستې ده کله به چې جګړه پیل شوه نو د دښمنانو په صفونو کې به یې لیکې ویستلې او مخې ته یې څوک نشو راتللی.
عمر بن خطاب (رضی الله عنه) چې کله د هجرت اراده وکړه نو حرم شریف کې یې دوه رکعته لمونځ وکړ بیا هلته د بیت الله شریف تر څنګ د مشرکانو د ناستو مشرانو څنګ ته ورغی ورته یې وویل: ښه راته وګورئ عمر بن خطاب یم او مدینې منورې ته روان یم که په تاسو کې څوک غواړي چې خپله مور پرې بوره شي نو له مخامخ غونډۍ نه هاخوا دې ما پسې راشي نو د مشرکانو مشران یو له بل سره وبنګیدل ویل یې: پریږدئ چې له دې سړي څخه خلاص شو دا خو موږ ته لوی درد سر دی هماغه و چې له ډاره یو مشرک هم ورپسې نه ولاړ، عمر (رضی الله عنه) په ښکاره هجرت وکړ او نورو صحابه کرامو د احتیاط لپاره په پټه توګه هجرتونه وکړل.
تاریخ لیکي چې د صلیبې جګړو پر مهال به صلیبیانو ویل: د صلاح الدین ایوبي کمانډویان دومره خطرناک دي چې مرګ هم له دوی څخه ډاریږي.
مثنی بن حارث هغه مسلمان چریکي او ګوریلا مجاهد و، چې د کسري امپراتورۍ کې به د شپې کفارو او یهودو خپل ماشومان بچیان د ده په نوم ویده کول، د ده یو څو محدود ملګري وو چې د کسرا په ټوله امپراتورۍ یې خوبونه حرام کړي وو.
محمد ابن قاسم بیا هغه کم عمره غازي و چې هندوانو به هم ورته دیوتا ویلو، ده په اولس کلنۍ کې پر سند حمله وکړله او مسلمانې اسیرانې خورګانې یې د راجاګانو له اسارت او بندیخانې څخه خلاصې کړلې.
یو فلسطینی ماشوم د ژړا په حالت کې وایي، موږ د ورځې لس لمنځونه کوو، پنځه فرضي او پنځه نور د جنازې.
د فلسطین د مظلوم او بې وسه ملت ښځې او ماشومان په شهادت رسیږي، په دوی کې یوې مسلمانې فلسطینۍ خور اوسنیو عربو ته داسې فریاد وکړ چې زموږ ماشومان وژل کیږي زموږ ماشومان بچیان ستاسو د عزت او ناموس دفاع کوي او تاسو په خپلو عیاشیو او فحاشیو کې د ذلت په خوب ویده یاست.
که موږ او تاسو فکر وکړو چې په ټوله نړۍ کې (۲۵) پنځه ویشت عرب هیوادونه او (۵۶) شپږپنځوس نور اسلامي هیوادونه همدارنګه (۲۰۰۰) دوه زره میلیونه نفوس په میلیونونو نظامي پرسونل، توپ، ټانګ، طیارې همدارنګه اتوم او نور تجهیزاتو سره د دې ټولو هیوادونو او امکاناتو بیا هم اسرایٔیل چې د اسلامې هیوادونو تر منځ پروت دی دومره پښې یې غځولې دي چې د فلسطین وړوکی د غزې ښار فقط د (۵) پنځه میلیونو یهودانو او کفارو لخوا د اور په لمبو کې سوځوي. نو ای د مسلمه امت غیرتي او با شهامته ځوانانو اسلام موږ ته دا درس نه راکوي، چې تاسو فقط او فقط ځانونه وساتئ بلکه اسلام موږ ته دا وایي چې کله اسلام او قرآن په خطر کې راغلل له سر، مال، اولاد، نظام، هیواد او هر څه باید تیر شو او د اسلام، اسلامي شعایٔرو او اسلامي امت دفاع وکړو چې تر ټولو ښه مثال یې د لوی ملا صاحب تاریخې کارنامه وه چې د یو عرب مجاهد په خاطر یې ټول نظام په خطر کې واچاوه خو دا یې قبوله نه کړه چې یو مهاجر پاک مجاهد د کفارو او یهودو په لاس کې ورکړي، لکه څرنګه چی په ۱۹۴۸ م کال کې غاصبو یهودو او کفارو کابو یو میلیون مسلمانان له خپلو کلیو، ښارونو پسې واخیستل او غزې ته یې وشړل دا د النکبة عرب لومړی فاز و او اوس یې چې په غزه کې هم نه پریږدي د غزې له شمال څخه بیا یو میلیون مسلمانان په زور او جبر سره ایستل کیږي دا د نکبة دوهم فاز ښکاري نو ای د اسلامي هیوادونو مسلمانانو!! له خوب څخه نور ویښ شئ، اړخ بدل کړئ که نور څه نشئ کولای یوازې خو یې معنوي کومک (دعا) او همدارنګه په نفس سره د فلسطین له مجاهدینو سره همکاري اعلان کړئ او د زړه له اخلاصه ورته دعا وکړئ چې الله(ج) یې د اسرایٔیلو په وړاندې بریالې او فاتحین وګرځوي. ان شاء الله
