د ایران د استخباراتو وزارت په یوه خبرپاڼه کې ويلي چې په تېرو څو ورځو کې یې ۱۴ داعشیان په بېلابېلو عملياتو کې نيولي دي.
په خبرپاڼه کې، چې نن جمعه د وږي میاشتې په دویمه نېټه خپره شوې، ويل شوي چې دا کسان په فارس، تهران، البرز او خوزستان ولایتونو کې تر هغه وروسته ونیول شول چې څو ورځې وړاندې ایران ته د بریدونو ترسره کولو په هدف په غیرقانوني ډول داخل شوي وو.
ایراني چارواکو او رسنيو تراوسه نه دي ويلي چې دا کسان څنګه او له کومو لارو ایران ته ننوتلي وو، خو داعشي خوارج په سیمه کې دننه د افرادو د انتقال لپاره د خپلې رهبرۍ د هستوګنې د اوسني مرکز، پاکستان، لارې کاروي.
