د بېلابېلو نړیوالو استخباراتي راپورونو، سیمهییزو سرچینو او مستندو معلوماتو له مخې، داعش چې ځان ته د “اسلامي دولت” نوم ورکوي، له هغې وروسته چې د اسلامي امارت لهخوا یې پر ضد پراخ او هدفمند عملیات ترسره شول، له افغانستانه وتښتېده او اوس یې د پاکستان خاوره په یوه خوندي پناهځای، تنظیمي مرکز او د دسیسو جوړونې مرکز بدله شوې ده.
په پاکستان کې نه یوازې د داعش غړي تمویلېږي، روزل کېږي او تبلیغاتي وسایل ورته برابرېږي، بلکې جګړهییز ماموریتونه ورته پلان کېږي او بیا د ګاونډيو او سيمې هېوادونو ته د تخریب، فتنې او ناامنۍ د خورولو لپاره استول کېږي. دا کړنه نه یوازې د ګاونډيو ملي امنیت ته خطر پېښوي، بلکې د ټولې سیمې، په ځانګړي ډول منځنۍ آسیا او جنوبي آسیا ثبات ته ستر ګواښ دی.
د پاکستان امنیتي ادارو دا ډول ښکاره یا پټه همکاري، له داعش سره د دوهمخې تګلارې ښکاره ثبوت دی. که نړیواله ټولنه دا موضوع جدي ونهڅاري او له پاکستانه څخه ونه غواړي چې خپل مسؤلیتونه ادا کړي، دا اور به د سیمې ټول هېوادونه وسوځوي.
د برهان زېد وژل؛ د پاکستان خاورې کې د داعش حضور مستند ثبوت وړاندې کوي. د المرصاد د مستندو او امنیتي سرچینو پر بنسټ راپورونه په ډاګه کوي چې د پاکستان د پنجاب ایالت په قصور ولسوالۍ کې یو لوړ پوړی داعشي مسؤل برهان، چې د زېد په نوم مشهور و، د نامعلومو وسلهوالو لخوا ووژل شو، برهان د داعش د تنظيمي جوړښت مهم غړی و، چې له پاکستانه یې د خوارجو د شبکې ملاتړ، همغږي او تمویل تنظیماوه. د هغه موجودیت د دې څرګند ثبوت دی چې د پاکستان خاوره د داعش د پټو فعالیتونو لپاره په پراخه کچه کارول کېږي.
د برهان زید د وژل کېدو وروسته، پاکستاني ادارې د هغه تړاو له داعش سره رد کړ اما، المرصاد ادارې د هغه او بل مشهور پاکستانی داعشي قومندان، عمر باجوري، یو ګډ عکس خپور کړ. عمر باجوري هماغه کس و، چې د ۲۰۲۴ کال د اکتوبر په ۲۰مه د کونړ ولایت په ماڼوګۍ ولسوالۍ کې د اسلامي امارت د امنیتي ځواکونو لهخوا، له یوه بل داعشي سره یو ځای ووژل شو.
دا عکس، چې له معتبرې امنیتي سرچینې ترلاسه شوی، د پاکستاني داعشي شبکې ترمنځ د اړیکو، همغږۍ او ګډو اهدافو روڼ ثبوت دی. دا فزیکي اسناد د هغو ټولو انکارونو دروغ بربنډوي، چې د پاکستان له لوري د داعشي فعالیتونو د نه موجودیت په نوم وړاندې کېږي.
برسېره پر دې؛ په دې وروستیو کې د افغانستان اسلامي امارت امنیتي ارګانونو یو شمېر پاکستاني داعشیان ژوندي نیولي دي. دې نیول شويو خوارجو، نه یوازې د داعش د جوړښت، دندو او مرکزونو په اړه معلومات ورکړي، بلکې په خپلو اعترافونو کې یې څرګنده کړې چې دوی د پاکستان استخباراتي ادارو له خوا تمویل، تجهیز او روزل شوي دي. د دوی دا افشاګري د هغو شواهدو دوام دی چې پاکستان د داعش له خوا، د افغانستان او سیمې پر ضد د تخریبي فعالیتونو ملاتړ کوي.
په داسې حال کې چې د داعش ډله په افغانستان کې د اسلامي امارت له سختو عملیاتو سره مخ ده، پاکستان د هغوی د بیا منظمېدو او راژوندي کېدو لپاره زمینه برابروي. نړیوالو بنسټونو، ملګرو ملتونو، ګاونډیو هېوادونو او د سیمې تحلیلګرو ته دا ثابته شوې چې د پاکستان خاوره د داعش لپاره د فعالیت، پټنځای او د دسیسو جوړولو مرکز ګرځېدلې ده.
دا وخت دی چې نړیواله ټولنه له پاکستانه د دې ډلې د بشپړ له منځه وړلو حساب وغواړي او دا هیواد د خپل دوهمخي سیاست مسؤل وګرځوي. که دا چاره ترسره نه کړي نو نړۍ به يوځل بيا د نه جبرانېدونکي خونړي وير سره لاس او ګریوان شي.