د داعش رسنۍ؛ د عکسونو او حقیقتونو جګړه:
کله چې د داعشي خوارجو ډله په خپل اوج کې وه، د وسلو تر څنګ یې له کیمرې او ټولنیزو شبکو څخه هم د تفرقې اچولو او ویرې خپرولو لپاره کار اخیست، دې افراطي ډلې دا خبره ښه درک کړې وه چې په یوویشتمه پیړۍ کې جګړه یوازې د جګړې په ډګرونو کې نه ده، بلکې په نمایشي پردو او د مخاطبانو په ذهنونو کې هم ترسره کیږي.
په دې دوره کې د انسان بدن یوازې د مرمیو هدف نه دی، بلکې دا ځل د انسان زړه، ذهن او روح د دوی د ویجاړونکو تبلیغاتو او فعالیتونو هدف ګرځي، داعش د خپلو پوځي عملیاتو او اعدامونو څخه د مسلکي ویډیوګانو په تولید سره، هڅه کوله چې هم د خپلو دښمنانو په زړونو کې وېره خپره کړي او هم د نړۍ له ګوټ ګوټ څخه ناخوښه ځوانان جذب کړي.
خو دا ستراتیژي بالاخره د داعش د سقوط یو له اصلي عواملو څخه شوه، ځکه چې نړیوالې رسنۍ او مقاومت کونکي ډلې، له هغه څخه خورا پیاوړې وې چې د داعش کیسه بې ځوابه پاتې شي، همدا د رسنیو غبرګون و چې د داعش د رسنیو فعالیتونه یې برعکس کړل او د هغوی د سقوط لامل شول.
په پیل کې، داعشي خوارج په رسنیزه جګړه کې ګټونکي ښکاریدل، دې ډلې د ټویټر، یوټیوب او ټلیګرام په کارولو سره، خپل پیغامونه ټولې نړۍ ته لیږدول. د دوی ویډیوګانې په لوړ کیفیت او مسلکي تدوین سره، کله ناکله د هالیووډ تولیداتو ته ورته وې، خو دا لاسوهل شوي عکسونه، ډیر ژر د داعش تر واکمنۍ لاندې د ژوند له سخت واقعیت سره په ټکر کې شول.
د موصل او رقې په څیر له ښارونو څخه د خلکو راپورونو د داعش د بدکاره کسانو د ناوړه کړنو پرده پورته کړه چې هغه څه چې داعش یې «اسلامي جنت» بولي، په حقیقت کې د ترور، لوږې او نا امیدۍ یو دوزخ دی، خپلواکو رسنیو او زړورو ژورنالیستانو د ویجاړیو، بې رحمه اعدامونو او د ملکي وګړو د کړاوونو عکسونه خپاره کړل چې د داعش افسانه او وهم یې له منځه یوړ.
په دې رسنیزه جګړه کې یو له مهمو ټکو څخه، د داعش د شیطان خویانو مشرانو د دوه ګوني ژوند افشا کول وو، په داسې حال کې چې دې ډلې خلک قناعت او ساده ژوند ته بلل، د داعش د مشرانو د شاندارو ماڼیو، زړه راښکونکو میلمستیاوو او شتمنیو د راټولولو عکسونه او راپورونه خپاره شول، دا تضادونه د دې لامل شول چې ډیری د داعش پلویان، په ځانګړي توګه کوم چې په لویدیځ کې و، له دې ډلې څخه لاس واخلي. ټولنیزې شبکې چې یوه ورځ د داعش پیاوړې وسیله وه، د مقاومت په فضا بدله شوه.
په انلاین فضا کې د داعش پای هم د هغې د پوځي سقوط په څیر عبرتناک و، لکه ټویټر او یوټیوب په تدریج سره د داعش اړوند حسابونه بند کړل، ټلیګرام، چې یو وخت د داعش لپاره خوندي ځای ښکاریده، بالاخره د دې افراطي ډلې چینلونه یې وتړل. بالاخره، داعش ډله پوه شوه چې نشي کولی د نړیوالو رسنیو، حکومتونو او انټرنیټي فعالانو د اتحاد په وړاندې مقاومت وکړي، نو ځکه داعش د عکسونو او حقیقتونو جګړه وبایلله؛ ځکه چې حقیقت تل له دروغو او وهمي تبلیغاتو څخه پیاوړی وي.
د دې لیکنې لوی درس دا دی چې په اوسنۍ دوره کې یانې د معلوماتو په دوره کې، هیڅ ترهګره ډله نشي کولی د تل لپاره حقیقت تحریف کړي، داعشیان شاید وتوانیدل چې د لنډې مودې لپاره په خپلو وحشتناکو عکسونو سره نړۍ ووېروي، خو بالاخره، د قربانیانو، خپلواکو راویانو او د آزادو رسنیو غږ د میدان ګټونکی شو. دا بریا د دې تایید ده چې حتی په تیاره ورځو کې، د حقیقت رڼا کولی شي د وریځو له منځه راوځي او دروغ رسوا کړي.